РД-йин образованиейинна илимдин министерствойин пресс-гъуллугънаан мялум гъапIганси, хьадан тятIиларин вахтна бицIидари рягьятвал гъадабгъру кампанияйин сабпи смена аьхирихъна гъафну.

 

Лагерарин сабпи сменайиъ гъубху ляхнин натижйир йивбан гьякьнаан РД-йин образованиейинна илимдин минис-терствойин тербияйин ляхнинна аьлава образованиейин управлениейин начальник Лариса Калмыковайи яркьу совещание гъубхну.
Заседаниейиз уч гъахьидари идарйирин арайиъ вуйи комиссйири гъурху ахтармишарин натижйирикан, шагьрарихьан ярхлади ерлешмиш духьнайи лагерариъ ляхнин къайда чIур апIбан дюшюшарикан, гьацира баяр-шубарин сагъламвал уьбхбан кампанияйин ляхин мялуматарин дакьатариъ яркьуди гъабхбан гьякьнаан месэлйириз гъилигну.

Лариса Калмыковайи къайд гъапIганси, бицIидари рягьятвал гъадабгъувалин кампания фициб дережайиъди кIули гъабхураш, гьаммишан гюзчиваликк ккади ва ахтармиш апIури гъахьну. «Тялукь комиссияйи лагерариъ бицIидар ва живанар яшамиш хьпан шартIар, санитария-йинна гигиенайин къайдйир, ипIру-убхърубдин ва медицинайин цирклин тяминвалин месэлйир сикин дарди ахтармиш апIбан ляхин гъабхури гъахьну», – къайд гъапIнийи Лариса Калмыковайи.

Дугъан гафариинди, рес-публикайиъ сабпи сменайиъ шагьрарихьан ярхлади ерлешмиш духьнайи 26 лагери ва мектебарин бинайиин арццнайи йигъандин 90 лагери ляхин апIура. Думу лагерариъ 13051 бицIири рягьятвал гъадабгъну.

Вари лагерариъ, сабпи сменайиъси, имбу кьюбиб смен-йириъра, министерствйиринна идарйирин жягьтлувалиинди тартиб дапIнайи программйириз асас вуди, культурайинна рягьятвал гъадабгъбан, спортдинна махлукьатлу серенжемар уьмриз кечирмиш апIиди.