Улихьна йигъари «Дагестанская правда» газатдин редакцияйин конференцйир гъахру залиъ Республикайин жямяаьтлугъ палатайин, Мягьячгъала шагьрин администрацияйин ва тикилишчивалихъди аьлакьалу ляхнар гъахурайи жюрбежюр циркларин вакилар уч духьну, Дагъустандиъ къанунсузди тикмиш апIурайи хуларикан «Дагестанская правда» газатдин 93-пи ва 94-пи нумрйириъ чап дапIнайи «Тикилишчивалин гьарай-вургьайин гъян» макьалайин гьякьнаан ва душваъ атIагнайи читин месэлйирикан улхури, чпин фик-рар ачухъ гъапIнийи.
Серенжем ачмиш апIури, «Дагестанская правда» газатдин кIулин редактор Бурлият Токболатовайи къайд гъапIганси, къанунсусди гизаф мертебйирин хулар тикмиш апIувал гъи республикайиъ варитIан ухди гьял дапIну ккуни читин месэла ву. Фицики, гьамци къанунсузди хулар тикмиш апIбан кьяляхъ, штухъди, газдихъди ва электроэнергияйихъди аьлакьалу хайлин жара месэлйирра арайиз гъюра. Мициб аьгьвалат саб Мягьячгъалайиъ ваъ, республикайин вари шагьрариъ а.
Серенжемдин иштиракчи, РД-йин жямяаьтлугъ палатайин председатель Аьбдулмуъмин Ибрагьимовди мялум гъапIганси, гьамусяаьт Мягьячгъалайин кIулиъ айидари шагьриъ цIийиди гизаф мертебйирин хулар тикмиш апIуз ихтияр туврайи сабкьан документ тувнадар. Ихтияр тутрувбан асас себеб — дурар меркездин инфраструктура дюзелмиш апIбиин машгъул духьна.
Республикайин жямяаьтлугъ паталайин председателин заместитель Сапарбейг Аьбдуллаевди, къанунсузди тикмиш апIурайи хуларин гьякьнаан улхури, къайд гъапIну:
«Учу къанунсузди диврайи хулариз аьксиди удучIвурача, аммаки гьаз-вуш ихь республикайиъ объект 5-пи метребейилан зиинди удубчIвуз хъюгъигантIан, думу къанансузди тикмиш апIурайибси гьисаб апIурадар. Думуган сарун дицдар объектар чIур апIуз кьан шула. Янаки, хал ужуб ери-йиинди дивнайиб вуйихъантина, думу рабгъуб лазим дар. Гьаддиз, гьадму жюрейиинди тикмиш гъапIу хулар къанундиккна хпан бадали, хайлин ляхин гъабхурача».
Серенжемдиъ Мягьячгъала шагьрин администрацияйин Архи-тектурайин управлениейин начальникдин заместитель Магьяч Аьлиевра иштирак гъахьнайи. Дугъу чан удучIвну улхбаъ мялум гъапIганси, гъийин йигъаз Мягьячгъала шагьриъ къанунсузди тикмиш дапIнайи 111 объект дюргъну, чIур дапIна.
«Пуз ккундузузки, ихь республикайиз гьелелиг 3 мертебатIан ягъли объектар чIур дапIну аладагъуз шлу техника адар. Мягьячгъалайиъ суддин къарарниинди уьлдюхну ккуни объектарин кьадар 600 ву. Аммаки, дициб техника адрувализ лигну, объектар гьаци айиганси дийигъна», — аьлава гъапIну Магьяч Аьлиевди.
