Улихьна йигъари Дагъустандин Правительствойин председатель Аьбдулмуслим Аьбдулмуслимовдин регьберваликкди сагъламвалин цирк-лиъ гъягъюрайи ляхнариз бахш дапIнайи заседание гъабхьну. Душваъ асас вуди республикайин сагъламвал уьбхбан министерствойи муниципалитерарихъди йитIнайи йикьрар тамам апIбакан гъулхнийи.

 

 

Заседаниейиъ республикайин сагъламвал уьбхбан министр Татьяна Беляевайи къайд гъапIганси, сач рес-публикайин муниципалитетарихъди, цIийи ФАПар дивбан бадали, 51 йикьрар гъийитIну. Дурар вари гьаму йисан аьхириз тамам дапIну ккудукIну, ФАПари ляхин апIуз хъюгъди.
Дагъустандин кьибла терефназди цIийи ФАПар Табасаран, Дербент, СтIал Сулейман, Хив, Мягьярамкент, Агъул, Докъузпара ва Рутул районариъ дивра.

Улихьна йигъари Табасаран райондиз РД-йин Правительствойин вакилар дуфну, гьамусяаьт муниципалитетдиъ диврайи 5 ФАП-дикан кьюб ачмиш гъапIну. Хъа НичIрас гъулаъ диврайи ФАП-дин гьякьнаан гъулан фельд-шер Беслан Мягьямедовди къайд гъапIганси, ФАП-дин вари ляхнар аьхирихъна дуфна. Гъубзрайиб анжагъ ФАП дивнайи ишвлан бару илтIибкIувал ву. «ФАП-дин тикилишчивалин ляхнар фици кIули гъягъюраш, улихьнаси республикайин сагъламвал уьбхбан министерствойин вакиларра дуфну гъилигнийи. Вари ляхнар пландиъ улпнайиганси тамам дапIна. Хъа гьелелиг душваъ ляхин апIуз ихтияр туврайи лицензия гьязурди адар. Думу гьязур гъабхьибси, ФАП дишлади абццну, ляхин апIуз хъюгъдича», – кIура гъулан участковый фельдшери.