2-пи июлиъ Табасаран райондин ЦРБ-йиъ аьхю серенжем кIули гъубшну. Табасаран райондин ЦРБ-йиз Урусатдин лайикьлу духтир, РД-йин халкьдин духтир, муганаз гьадушваъ кIулин духтирди лихури гъахьи Мирзамягьямед Мягьямедовдин ччвур тувну. Гьадму гьядисайихъди сатIиди дугъаз больницайин гьяятдиъ ядигарра дивну.
Мирзамягьямед Мягьямедов Дагъустандин халкьдин игит, Дагъустандин халкьдин духтир, РФ-дин ва РД-йин лайикьлу духтир, РФ-дин сагъламвал уьбхбан отличник заан ччвурарин сагьиб ву, думу «Гьюрматлувалин лишан» кIуру медалихъдира лишанлу дапIна. Ляхниъ заан хъуркьувалар гъазанмиш апIбаз лигну, Мирзамягьямед Ханмягьямедович Урусатдин Президентди хилихъ хъибтIру сяаьт тувбииндира лишанлу гъапIну.
Серенжемдиъ иштирак’вал апIуз, райондин улихь-кIулихь хьайидар ктарди, гьюрматлу хяларра дуфнайи. Дурарин арайиъ РД-йин Правительствойин председателин заместитель Мурад Къазиев, РД-йин сагъламвал уьбхбан министр Татьяна Беляева, республикайин Халкьдин Собраниейиъ РД-йин Главайин кюмекчи вуйи Нюсрет Уьмаров, Халкьдин Собраниейин депутат Алавудин Мирзабалаев айи. Му серенжемдиъ гьацира машгьур духтрин хизан, худлар, мирасар, дугъан дустар, Мирзамягьямед Мягьямедовдихъди ляхин апIури гъахьи касар иштирак гъахьну.
Табасаран райондин ЦРБ-йиз Мирзамягьямед Мягьямедовдин ччвур тувбан бадали адабгънайи Сергей Меликовдин къарарнахъди таниш апIури, серенжемдиъ Нюсрет Уьмаров удучIвну гъулхну. Дидин кьяляхъ ядигар ачмиш апIбан ва дидихъ кюкйир дивбан серенжем кIули гъубшнийи.
«Гъи ухьу, ихь сагъламвал уьбхбан отличник, халкьдин лайикьлу бай Мирзамягьямед Ханмягьямедовичдин яс уьбхюри, дугъахьна вуйи гьюрмат улупуз уч духьнахьа. Райондин больницайиз дугъу чан уьмрин аьхюбсиб пай бахш гъапIну. Райондин медицина заан дережайиз адабгъбан бадали, ужуб коллектив уч гъапIну. Коллективдин ва дустарин арайиъ заан гьюрмат гъазанмиш дапIну, жямяаьтлугъ ляхнариъра, райондиъ гъягъру вари серенжемариъра жанлуди иштирак шули гъахьну. Аьхиримжи йисари дугъу яшлуйирин Советдин председателди ляхин апIури гъахьну» — къайд гъапIнийи чан удучIвну улхбаъ Табасаран райондин глава Мягьямед Къурбановди.
Дупну ккундуки, Мирзамягьямед Мягьямедов 50 йисанкьан ЦРБ-йин кIулин духтирди гъилихну. Думу ЦРБ-йин кIулиъ айи вахтна му идара РД-йин сагъламвал уьбхбан идарйирин арайиъ хъади-хъади 14 ражну варитIан ужубси гьисаб гъапIну.
«Табасаран райондин больницайиз сагъламвал уьбхбахъан юкIв убгури гъахьи касдин ччвур тувну. Узу Мирзамягьямед Ханмягьямедовичдихъди хайлин йисари ляхин гъапIунза. Думу касди учв ЦРБ-йин кIулиъ айи вахтна райондиъ саб хайлин ФАПар тикмиш гъапIну, инсанарин сагъ’вал уьбхбаъ медицинайин идарйирин ляхинра саб хайлин улихь гъябгъюз гъитну. Аьхю шулайи насли, медицинайин жигьил гъуллугъчйири кIваинди гъибтбан бадали, мицдар серенжемар гъахували уйнамиш апIурайи роль аьхюб ву. Думу кас гьарган ихь кIваъ гъузди», — гъапнийи Татьяна Беляевайи.
Му серенжемдиъ удучIвну гъулхдари варидари Мирзамягьямед Мягьямедовди медицина артмиш апIбак киву пайнакан гъапнийи, дугъу апIури гъахьи ляхнар кIваин гъапIнийи ва дугъахъди вуйи дустваликан ктибтнийи.
Хъасин Мирзамягьямед Хан-мягьямедовичдин бай Руслан Мягьямедовди чпин хизандин терефнаан РД-йин Главайиз, райондин руководствойиз, республикайин сагъламвал уьбхбан министерствойиз ва чпин адашдин ядигар ачмиш апIбан серенжемдиъ иштирак гъахьидариз варидариз аьхю чухсагъул мялум гъапIнийи.
Серенжем аьхирихъна гъафиган, гьюрматлу хялар райондин главайихъди больницайин дараматарилан ва аьтрафарилан илдицну. ЦРБ-йин кIулин духтир Абсередин Мирзабеговди дуфнайи хялар гъубшу йисан капитально рас дапIнайи вари отделенйирихъди таниш гъапIну.
Мидланра гъайри, 2-пи июлиъ Табасаран райондиъ кьюбсан шаду серенжемар кIули гъушну, Мягьрягъ гъулаъ духтрарин амбулатория ва ЦIийи – Лижва гъулаъ ФАП ачмиш гъапIну. Мягьячгъалайиан дуфнайи хялар думу серенжемариъра иштирак гъахьну.
