Сабпи майдиъ Табасаран райондин Хючна гъулаъ, ихь республикайин жара районариъси, хьадукран ва зегьметнан Йигъаз бахш дапIнайи аьхю шадвалин машквар къайд гъапIну.
Думу серенжемдиъ «Табасаран район» МР-ин глава Мягьямед Къурбанов, райондин администрацияйин, идарйирин гъуллугъчйир, райцентрин ва хайлин жара гъуларин агьалйир иштирак гъахьну. Уч духьнайидарин улихь удучIвну улхури, райондин образованиейин гъуллугъчйирин профсоюздин райкомдин председатель Зейфудин Керимовди 1-пи Майдин машквар арайиз гъюбан тарихдикан, ихь халкьдин зегьметнан тарихдикан ва адлу инсанарикан ктибтну ва машквриз уч духьнайидар тебрик гъапIну. Райондин кIулиъ айидарин терефнаан серенжемдиъ «Табасаран район» МР-ин депутатарин Собраниейин председатель Аьлимягьямед Къазиев удучIвну гъулхнийи. Уч духьнайидар машкврихъди тебрик апIури, дугъу гъапнийи: «Му хьадукран машквар ихь халкьдин варитIан ккуни машкврарикан саб ву. Амма, гьяйифки, аьхиримжи йисари думу къайд апIбаз райондиъ цIибдитIан фикир туври адайи. Ццийихъантина ухьу думу машквар, улихьна йисариси, яркьуди ва машгьурди къайд апIидихьа». Аьлимягьямед Къазиевди гьацира, цIийи глава ктагъбахъди аьлакьалу вуди, райондин улихь хъана заан месэлйир дийигънайиваликан ва дурар гьял апIуз ккайиваликан гъапнийи. «Майдин машквар – му зегьметнан инсанарин гафнан сабвалин, чиб-чпиз кюмек тувуз гьязурвалин машквар ву. Думу ужуб аьдат ухьу гьарган давам апIидихьа, ихь ватан ижми ва мюгькам апIбан бадали, думу балгбан бадали, лайикьлу зегьмет зигидихьа», — къайд гъапIнийи Аьлимягьмед Къазиевди. Серенжемдиъ гьацира «Хючна гъулан совет» МО СП-йин глава Аьбдуселим Гираев удучIвну гъулхнийи.
Серенжем кIули гъябгъюрайи вахтна, душваъ чпин музыкайин, мяълийирин номерар улупбиинди райондин культурайин Хулан гъуллугъчйири тамашчйир рази гъапIнийи.
Думу йигъан спортдин серенжемарра башламиш гъапIнийи: футболиан, волейболиан ва спортдин жара жюрйириан турнирар. Майдин машкврариз бахш дапIнайи думу серенжемар швнуд-сад йигъан давам хьиди.
Шиклариъ: райцентриъ 1-пи Май къайд апIури.
