7-пи июлиъ Табасаран райондин администрацияйин актовый залиъ мектеб гъизилин медализ ккудубкIу баяр-шубар лишанлу апIбахъди аьлакьалу шадвалин серенжем кIули гъубшнийи.
Душваъ Табасаран райондин кIулиъ айи Мягьямед Къурбанов, райондин депутатарин Собраниейин председатель Иса Исаев, образованиейин управлениейин кIулиъ айи Аьбдусалам Гьясанов ва пишекрар, райондин жигьиларин центрин вакилар, мектебарин директорар, урхурайидарин абйир-бабар ва урхурайидар иштирак гъахьнийи.
Мектебдиъ заан кьиматариз урхури, ужудар аьгъювалар гъадагъурайи выпускникар Табасаран райондиъ цIиб адар. 2022-пи йисан райондин мектебариан вуйи 30 выпускник гъизилин медалариз лайикьлу гъахьну.
Шадвалин йигъинжагъ ачмиш апIури, Табасаран райондин глава Мягьямед Къурбановди урхурайидар, дурарин абйир-бабар ва мялимар му шадлугънан серенжемдихъди тебрик гъапIнийи.
«Му учву 11 йисан гъизигу зегьметнан натижа ву, хъа ичв улихь аьхю уьмур хьайичв. Ичв хъуркьувалариин учу шад вуча. Чухсагъул ичв абйир-бабаризра, мялимаризра. Гележегдиъра аьхю хъуркьувалар ишричвуз. Учву наана гъушишра, ихь район, мектеб лайикьлуди улупну ккунду, жвуван халкьдин культура, тарих кIваълан гьаъну ккундар. Фуну урхбан идарайиъ урхури гъахьишра, учву анжагъ заан натижйир улупур кIури, умудлу вуча. Медаларин сагьибар гъахьидар райондин руководствойин терефнаан тебрик апIури, учву ктабгъу пишейиъ, уьмриъ аьхю хъуркьувалар гъазанмиш апIувал ва Ватандиз лайикьлу касар хьувал ккун апIураза», – гъапнийи дугъу выпускникариз.
Серенжемдиъ удучIвну улхури, бицIидарин ихтиярар уьрхбаан РД-йин Главайин багахь вари ихтиярар айи вакил Марина Ежовайи урхурайидариз насигьятнан гафар гъапнийи ва дурариз хъуркьувалар ккун гъапIнийи.
«ЕГЭ думукьан къурхулуб дарувал гъи мина уч духьнайи выпускникарира субут апIура, гьаз гъапиш дурари мектебра заан аьгъювалариинди ккудубкIну, имтигьнарра хъуркьувалиинди тувну. Гьамус учву цIийи уьмрин рякъюъ учIврачва. Гъизилин медалар гъадагъбахъди тебрик апIури, учвуз гъюрайи уьмриъ, аьгъюваларин рякъюъ заан натиж-йир улупуб, ичв метлебарихъ, хияларихъ хъуркьуб ккун апIураза», – гъапнийи дугъу.
Серенжемдин аьхириъ Мягьямед Къурбановди ва Марина Ежовайи 30 выпускникдиз кьялан образование ккудубкIбан гьякьнаан уьру рангнан шагьадатнамйир ва медалар тувнийи.
Мидланра гъайри, Табасаран райондин главайин грантарин сагьибариз 14 сертификат тувнийи, хъа 5 выпускник бицIидарин ихтиярар уьрхбаан РД-йин Главайин багахь вари ихтиярар айи вакил Марина Ежовайин терефнаан чухсагъул мялум апIбан кагъзариинди лишанлу гъапIнийи.
Гьацира Хючнаарин сабпи нумрайин лицейдиъ ккергъбан классариз дарсар киврайи Аминат Балаевара РД-йин образованиейинна илимдин министерствойин терефнаан Гьюрматнан грамотайиинди лишанлу гъапIну.
Гъит ихь медалар гъадагъу баяр-шубариз ва вари выпускникариз чпин юкIв хъайи вузарик урхуз кучIвуз, мурад-метлебарихъ хъуркьуз, аьгъюваларин рякъюъ заан натижйир улупуз мюгькам сагъ’вал туври.
