Гьар йисан хьадан вазар ккергъубси, инсанар гьюлихъна жикIуз гъягъюз хъюгъру. Аьхиримжи йисари республикайиз гъюрайи туристарин кьадарра артухъ шулалайивализ лигну, гьюлихъ ва нирарихъ жикIурайи касарин кьадар атухъ шула. Амма дурари штук жикIбан къайдйир тамам апIурадар. Гьяйифки…

 

 

Гьаму йисан штук жикIру фасил ккебгъхъанмина, республикайин аьт-рафариин 29 кас штукк ккахьну гъийихну. Гьадрарикан 1 турист ва 11 яшар бегьем духьну адру бицIидар ву кIури, 20-пи июлиъ «Дагестанская правда» газатдин редакцияйиъ кIулиъ гъубшу пресс-конференцияйиъ, Дагъустандиъ айи Урусатдин МЧС-дин кIулин управлениейин начальникдин заместитель Муслим Муслимовди мялум гъапIну. Дугъан гафариинди, инсанар штукк ккахьну йихувалин асас себебар – микIар хъайи вахтна штук кучIвувал, ихтияр адру йишварихь жикIувал, гьюлихъ бицIидар абйир-бабарин гюзчиваликкан ккадахъувал, пиянвал кади штук кучIвувал ву.

МЧС-дин пишекри туву мялуматариинди, гьюлин, нирарин, даграрин гъирагъарихъ хатIасузвал уьбхювал – муниципалитетариин али буржи ву. Хъа гъийин йигъаз республикайиъ думу ляхин лазим вуйи саягъниинди анжагъ ДербентдиътIан тешкил дапIнадар.

«Дагъустандин аьтрафариин гьюлин гъирагъдин манзил 600 километр ву. Гъулариъ айи нирар, даграр гьеле гьисабназра гъадагъурадарза. Вари гюзчиваликк уьрхюз я учхьан шулира дар, я удукьурира. Гьаддиз, думу ляхин чпин районариъ гьарсаб муниципалитетди тамам апIури, абйир-барари ва мялимари бицIидар штун зиин хатIасузвал уьбхбан гъавриъ тIаъри ккунду.

Гьяйифки, ихь инсанарариз кIуруб гъагъиди ебхьуру ва дурари штук кучIвбан къайдйирра зат уьрхюрадар», – гъапнийи Муслим Муслимовди.