Дагъустандин Правительствойин председателин заместитель Нариман АьбдулмутIалибов улихьна йигъари Табасаран райондиз гъушну. Райондиз гъюруган, дугъахъди РД-йин Халкьдин Собраниейиъ айи республикайин Главайин вакил Нюсрет Уьмаров ва депутат Алавудин Мирзабалаевра хъайи.
Райондин глава Мягьямед Къурбановди хялар райондиъ гъулан мяишатдин цирклиъ гъягъюрайи ляхнарихъди таниш гъапIну. Сабпи нубатнаъди дурар СиртIич гъулаъ 2 гектар жилиин дивнайи, гьаму деврин теплица «Лоза» СПК-кайиз гъушну. Мяишатдин кIулиъ айи Агъамирза Шамсиевди дуфнайи хялариз чан мяишатдикан ва душваъ гъягъюрайи ляхнарикан мялуматар тувну. Теплицайин мяишат вари коммуникацйирихъди, гьадму гьисабнаъди литIнариинди шид хъубзру гъурулушдихъдира тямин дапIна. Вари ляхнар тамам апIуз Агъамирза Шамсиевди 100 миллион манатдин харжар ахьну. Дугъу цци чвну сабпи ражари вуди му теплицайиъ памадрар кивуз ва 50 касдиз лихру йишвар ачмиш апIуз планламиш дапIна.
Мидланра гъайри, Агъамирза Шамсиевди 6 гектариъ жвугърийирин, 25 гектариъ тIумтIин багъларра итна, багарихьди 5 гектариъсан нимкъарра кивуз планламиш дапIна.
Аммаки СиртIчарин гъулаъ жилар къайдайиъ тIаувал гъагъиди гъубзра, гьаддиз теплицайиккна газ зигуз гьелелиг шуладар. СиртIич гъулан аьтрафариин али «Табасаранское» ГУП-дин жиларин месэла гьял дапIну адрувализ лигну, гъулан агьалйирихьан чпин гъулахъ хъайи жилар ишлетмиш апIуз шуладар, фицики гъи банкрот гьисаб дапIнайи ГУП-дин жилар республикайин жиларин ляхнариз лигру министерствойин хиликк кка.
Гьаму месэлайин гьякьнаанра гъулан агьалйири Нариман АбдулмутIалибовдихъди гафар гъапIну ва ГУП-дин жилар гъулан администрацияйин хиликкна тувуз кюмек апIуб ккун гъапIну. Нариман АбдулмутIалибовди гьяфтайин арайиъ му месэлайин гьякьнаан, ГУП-дин жиларихъди аьлакьа айи инсанарра уч дапIну, совещание гъабхуз гаф тувну.
Мидланра гъайри, СиртIич гъулаъ штун гьякьнаанра аьгьвалат гъагъиб ву. «Марцци шид» федералин программайин дахилнаъди, гъулаз шид зигбан ляхнарра гьамусяаьт давам шула. Нариман АьбдулмутIалибов кIулиъ ади дуфнайи делегация гъулаз зигурайи шид уч шулайи йишваз гъилигну. Гъийин йигъаз проектдин дахилнаъди, шид уч шулайи йишвхьан гъулан кючйиризкьан 8 километрин манзилнаъ турбйир ккирчна, ва гьамусяаьт насос-дин станция дивра.
Табасаран райондиъ тикмиш апIурайи 1 агъзур тонна мейвйир ва йимишар уьрхру йишван тикилишчивалин ляхнар аьхирихъна гъюра. Райондиз дуфну имиди, делегацияйин вакилар думу объектдин ляхнар фици гъягъюраш лигузра гъушну. Объект ТинтIарин жилариин диврайиб ву, ва, думу ляхник кипган, мушваъ йимишарна мейвйир, дурарик кайи мянфяаьт сад йисазкьан гъубзруганси, уьрхюз мумкинвал хьибди.
Нариман АьбдулмутIалибов Табасаран райондиъ тIумутIчивалин циркилра фици артмиш шулаш, таниш гъахьну. Райондиъ 2014-пи йисхъан мина гъийин йигъазкьан 1500 гектариъ тIумтIин багълар итна, ва дурарикан 1200 гектариъ айидари бегьерра тувра.
Дарвагъ ва Ярса гъуларин аьтрафариин 800 гектариъ айи тIумтIин багълар Дербентдин чяхрарин заводди кивнайидар ву.
Му йигъан Мягьячгъалайиан дуфнайи делегация меценат Гьяжибег Аьлибеговдихъдира гюрюшмиш гъахьну. Дугъу, эгер чан проектдиз жил жара апIбан месэла гьял гъапIиш, райондиъ консервйирин завод тикмиш апIуз учв гьязур вуйиваликан хабар тувну.
«Гъи Табасаран райондиъ гъулан мяишат ужуди артмиш хьуз фукьан вушра мумкинвалар а. Гьюкуматдин терефнаанра туврайи кюмекнан гьякьнаан агьалйир гъаврикк ккаъну ккунду. Айи читинвалар сатIиди гьял апIуз, учура ич терефнаан кюмек тувуз гьязур вуча», – гюрюшнан аьхириъ аьлава гъапIну Нариман АьбдулмутIалибовди.
