Гъябгъюрайи йисан Дагъустандин вузариъ пише гъадабгъуз 15 агъзуртIан артухъ абитуриентари документар тувну. Улихьна йисариси ццира жигьиларин арайиъ юридический, экономический ва мялуматарин дакьатарин факультетар машгьур ву.

 

 

Мисалназ, Дагъустандин гьюкуматдин университетдиз ва дидин филиалариз бакалавриатдин ва специалитетдин программйириан урхуз 6559 аьрза тувна. Дурарикан 1505 касди бюджетдин бинайиинди урхуз планламиш дапIна, хъа имбу 2120 абитуриентди контрактдин къайдайиинди урхиди. ДГУ-йиъ абитуриентари аьрзйир варитIан гизафси юридический институтдиз, информатикайин ва управлениейин факультетариз тувна.

Дагъустандин гьюкуматдин медицинский университетди 2043 аьрза кьабул гъапIну. Мушваъ урхуз документар туву жигьиларикан 644 кас бюджетдин йишвариина гъадагъиди ва 360 касдиз гьар йисан урхбахъан пул тувуб алабхъиди. Асас вуди ДГМУ-йиъ абитуриентари сагъ апIбан, силбарин уьзрар сагъ апIбан ва педиатрияйин факультетар ктагъури шулу.

Дагъустандин гьюкуматдин педагогвалин университетдиз 3604 касди документар тувну. Бюджетдин йишвариин 1913 студентдиз урхуз мумкинвал хьибди, хъа 290 касди пулихъди урхбан къайда ктабгъну. Гъябгъюрайи йисан ДГПУ-йиъ абитуриентари гизафси аьрзйир физкультурайин, филология-йин ва психологияйин факультетариз тувну.

Дагъустандин гьюкуматдин халкьдин мяишатдин университетдира 1070 абитуриентдин аьрзйир кьабул гъапIну. Мушваъ 600 студентдиз пулсузди, хъа 690 касдиз урхбахъан гьар йисан пул тувбан къайдайиинди урхуз мумкинвал а. ДГНУХ-диъ жигьилари асас вуди экономикайин, юриспруденцияйин ва мялуматарин хатIасузвал уьбхбан факультетар ктагъну.

Дагъустандин гьюкуматдин технический университетди деврин цIийи пишйириан факультетар арццна – программный инженерия, мялуматарин дакьатар ва нефтегазовое дело. Гьаму университетдиз цци 1601 абитуриентдин аьрзйир кьабул дапIна. Дурарикан 1107 жигьили бюджетдин къайдайиинди урхиди.