Аьхиримжи йисари Хив райондин культурайин хулариъ ва библиотек-йириъ ужувлан терефнахъинди дигиш’валар духьна. Гьаци хайлин ужагъариъ айтIан ва чIатанди цалар катIра ва арсура, дурарин жиликк ккайи кьулар ва айтIан гъваар гьюдюхюра, таза унчIвар ва раккнар гъивра, тамашичйириз деуз цIийи креслйир дивра. Гьаддихъди сабси, клубариъ ва СДК-йириъ сягьнйир яркьу апIура, сягьна абццру таза чарчар кирхра, музыкайихъди аьлакьалу вуйи аквар китIра, культурайин ужагъар художественный самодеятельностдин терефнаан лазим вуйи палтарихъди, таза аппаратурайихъди, хъа библиотекйир цIийи художественный китабарихъди тямин апIура.
Гьаму йигъари Асккан Яракк, Заан Яракк, Мажвгул, Ляхла, Ургъа, ГъуштIил, Гъвандикк, ЦIудихъ, ЦIийи Фрюгъ ва ЗахитI гъуларин культурайин хулар компьютерарихъди, мебелихъди, музыкайин цIийи авадлугъарихъди ва интернетдихъди тямин апIиди.
– Магьа шубуд кIуру йис вуйиз лазим вуйи кIажар гьязур апIури, жаргъури, республикайин ва гьацира вари Урусатдин халкьарин проект «Культура» кIуру программайиъ иштирак шули. Гьар йисан му проектдин дахилнаъди райондин культурайин хулариз лазим вуйи дакьатар рукьура.
Гъи ихь уьлкейиъ фуну ляхниз вушра кюмек тувру проектар ва грантар гьяракатнаъ а. Ккунди айиб анжагъ вахтниинди, лазим вуйи саягъниинди кагъзар-кIажар гьязур дапIну, дурариъ иштирак хьувал ву.
ИкибаштIан, вари узуз ккунибси шули адар, хъа вушра узкан асиллу вуйиб апIури, гъи райондин культурайин хулар уликкна хуз чалишмиш шулаза. Гьелбетда, думу йиз асас буржира ву. Культурайиъ лихурайи гьарсар касди, «культура – халкьдин рюгь, девлет, ирс ва дамагъ ву» дупну, чахьна рубкьурайи кюмек лазим вуйи къайдайиинди албагну, ляхниъ ишлетмиш апIури, халкьдихьан баркаллагь гъадабгъну ккунду. Эгер гьаци гъабхьиш, халкьдин арайиъ культурайи чан хусуси, рюгьнан ва ирснан йишв бисиди.
Ухьу дициб баркаллагь гъадабгъур дупну, узу миж кивраза ва дид’ин умудлура вуза, – къайд апIура Хив райондин администрацияйин культурайин, спортдин, жигьиларин политикайин ва туризмдин отделин кIулиъ айи Казбек Къазиевди.
