Хайлин йисар улихьна шагьрин газатдик, сар флану касди шлин-вуш икриъ дипнайи токран йирси пич гьитIибкIну, дугъан суд апIурайиваликан макьала гъурхган, гьиссар гъидикьну гъахьнийиз. Ихь уьмриъ миллионар гьитIикIурайидар азад вуйиб, хъа йирси пич лазим вуди, мюгьтаж’валиъ айидарин диван апIуз гьязурди айивал куризра рябкъюрайи. Узуз пич гьитIибкIу касдин гизаф язухъ гъабхьнийзуз.
Гьаци саб вахтна телевизориан вуйи хабраригъ, сар кьаби бабу магазиндиъ гъяфатарсдар нисар (сырокар) жибаъ ирчну, пул тутрувди кассайилан улдучIвури гъидисну, ва баб, учв ахтармиш гъапIган, амриан гъушну кIури, ктибтурайи. Кьаби касдин чав жибдиъ ивуб кIваълан гъябгъюзра мумкин ву. Хъа эгер гьадму яшнаъ айи баб, чан юкIв хъайи нисун тики пулихъ гъадабгъуз даршули, гьитIибкIруси аьжузди гъитнаш, думу гьациб йишвахъ хъаънайидарин тахсир ву! Лихурайи вая гъилиху инсан аьжузди аш, дугъан диван апIбан ерина, думу дарвалиан адауз кюмек духьну ккунивалиин узу шаклу дарза.
Уьмрихьан гьадатIнайи мягьрумариз француз литературайин классик Виктор Гюгойи бахш гъапIу машгьур «Нигь дапIнайидар» («Отверженные») романдиъ чан гашди айи хизандиз уьл гьитIибкIуриз къад йис дустагъ гьадабтIбакан бикIура. Думу романдик гьякь абгурайи инспектори инсандин уьмур чIур апIура, хъа чан арс гьитIибкIу касибриз хулаъ имбу арсран шамданарра багъиш дапIну, думу дустагъдиккан ккадау епископди икI гъапIу инсан, харжибдиз туба дапIну, марцци рякъюз гъюз гъитра.
Гьелбет, му гафар икI апIрудар марцц апIури кIурайидар дариз. ИкIарра саб жюрейиндар дар. Гъи ихь жямяаьтдигъ хизан уьбхюз уьл гьитIибкIру йишвахъ хьузкьан аьжузарра гъядаршул. Хъа тухъ’валиан вая сархуш’валиан вардин пай кайиб гьитIибкIруган вая пуч апIруган, икибаштIан, дицдар гьяракатариз юкIв жара саягъ либгуру. Мисалназ, гьамусяаьт Дербентдин кючйириъ, икрариъ, паркариъ цIийи фонарар, бицIидари тамшир апIру йишвар, чIюрхяр ахьрудар гизафди йитIура. Хъугъуз читин ляхин ву, амма саспи йишварилан фонарин столбар, бицIидарин жуккмар гьитIикIну гъурху дюшюшар а. Паркариан чIюрхяр ахьру рукьан урнйир дургура.
«Агьалйир ихь шагьриъ шулайи цIийиваларихъди вердишди адар. Сад-кьюд йисаз дурар вердиш хьиди ва яваш-явашди айиб уьбхюз хъюгъди», – кIура, йиз гъалаб сикин апIури, узуз таниш психологди икрариъ ва паркариъ вардин пай кайиб уьбгъюри хьувалин гьякьнаан. Дербентдиъ ОМВД-йин полицияйиъ лихурайи старший сержант Венера Кюребеговайи вардин пай кайи йишвлан икI апIрударин гьякьнаан вуйи ич сюгьбатнаъ гьамци гъапнийи: «Шагьрин жямяаьтлугъ йишварилан варди ишлетмиш апIурайи мутму гьитIибкIу вая чIур гъапIу касдиз гьюкуматдин къанундиъ, административный штрафарилан гъадабгъну, уголовный тюмбюгь адабтIбиина гъя-йиз жаза тувувал улупна».
Ав, вардин пай кайиб чIур апIрудар ва халкьдинубдиин хил иливрудар къанундира, инсанарира дерккну ккунду. Йиз фикриъ, шагьрин паркар-кючйирра тина дапIну, Кьалухъ Мирзайин дерейиъ вардин пай кайи яркур ккидипури, дагъдин табарин кIулар алдатIурайи гъвандин карьерар дийи-гъура. Дугъриданра, икIар жюрбежюрдар шулу. Аьхю икIари къанун алдатмиш апIурира шулу. Аммаки, гьар фици вушра, зиянкарвалиинди вардин пай кайиб гьитIибкIурайидари, чпиз гьялал даршул кIури, фикир апIурдайкIан?!
