Йирси газатар ккадаркури
Йигъан кьюб норма
АхьитI гъулаъ Калининдин цур али колхоздин колхозникарин арайиъ хярар уршвбаъ социалистическое соревнование яркьу духьна. Соревнованиейиъ дявдин къуллугъчйирин кюлфетари чпи асас вуди улупура.
Хяр увшвуз йигъандин номар 30 сутих вуди фронтовикдин хпир вуйи Агъасиева Бесханумди 70 сутих 15 яшнаъ айи Агъасиева Магьиятди 65 сутих норма тамам апIуру.
Хярар уршвбаъ юл.Айвазовдин бригада нумуна вуди гъягъюра. Му юлдшин бригадайиъ зегьметдин тербия ужуйи дивна. Хъа юл.Агъамягьяммедовдин бригада кьяляхъ хъа. Агъамягьяммедовдин бригадайи Айвазовдин бригадайихъ хъуркьбаз кьаст апIуб лазим ву.
А. КЪЯГЬРИМАНОВ
«ДУГЪРУ ТАРАЗЙИР»
Хючна гъуллугъчйириз уьл увжру пекарнияйиъ Неби лихура. Ляхин ужуйи ву, амма «таразйир» аьгъю апIуз шлудар дар. «Таразйирик» номрийир ктар. Килограммар кIуруш марциди адар.
21-пи числойиъ (июнь) Небийихьна Аьбдулкерим гъюру. Вахт хябяхъ ву. Аьбдулкеримди Небийихьан уьл ккун апIуру. Небийи талон бисну, уьл гьадатIуру. Аьбдулкеримди минди тинди дилигну таразйир агуру. Дугърудан таразйир адар. Наан явцидикIан кIури Аьбдулкерим фикирнаъ ахъну. Небийи Аьбдулкеримдихьинди уьл гьачIавккуру.
― Му фукьан ву?
― Саб кило.
― Саб кило даршулда Небихалу!
― Дюзди саб кило ву, артугъдира кади.
― Саб кило шул кIури гьич уьмуд апIударза.
― Яда уву фу кIурава, килона гьацI а мидиъ.
Гьякьикьат 700 грам уьл шул. Хъа Небийи чан хилариинди дивцну тувну. Белки Небийин хилар «дугъру таразйир» вуйкIан. Думу аьйдариз. Дугъруданда таразу адарди хилиъ давцну Небийи уьл тувру.
ДумутIан башкъа пекарня уьл тувру касса духьна. Фуж вушра дуфну учьру.
И. Гьябибов.
«Колхоздин уьмур»
№26 (851),
29 июнь
1946-пи й.
УСТА ЧАН ЛЯХНИЪ
ТУРУФ. (Ич. Корр.) Буденныйдин цур али колхоздин 3―пи бригадайиъ уставал кайи колхозник юл. Расулов Асланди колхоздиз зурба кюмекар апIуру. Мугъу июньдин 25―пи числойизкьан колхоздиз 5 фур, 4 чъумрар, 4 ярккгъар, 7 цурцар, 30 кьюршар ва 12 жяхрегар гьязур гъапIну. Мугъан ляхин тахилар уч апIбан кампанияйиз зурба кюмек ву.
Н.ГЬЯЖИБЕКОВ
ЦIИЙИ УРХРУ ЙИСАЗ ГЬЯЗУР ШУЛА
Хив райондин вари школйириъ хулар ва алатар рас апIуб башланмиш духьна. Колхозарин кюмекниинди 150 кубаметртIан артугъ кIакIлар Хив кьялан шолайиз ва учителариз духна. Гьацира Къандикк, Гашан гъулаъ, Хрижъ гъуларин тамам дару кьялан школйиризра бегьемди кIакIлар духна.
Лика ва Зирдагъ гъуларин сифтейин школйир вари урхру йисаз бегьемди кIакIларихъди тямин дапIна.
Райондин йирхьуб школайиъ бегьемди рас апIувал ккудукIну.
Райондиъ школайин яшнаъ айи бацIидарин учет ккудукIну. 1.600-тIан артугъ учетназ гъадагъну.
ДумутIан башкъа колхозникарин инициативдиинди школайин багахь 32 гектар йишв гъувзну. Гьаму ляхниъ асас вуди Сталиндин цур али «ВЛКСМ―дин Х ― пи съезд», «Большевик» колхозарин колхозникар ужуйи иштирак гъахьну.
А.ВЕЗИРОВ
Дагълу ватандин комсомолариз
Аьзиз Ватандин жаванар!
учвуз гизаф гьюрматлу Красноармейский саламар хътауруча!
Ихь уьлкейин халкьар дявдиъ гъахьи зийнар ухти сагъ апIбахъ хъюгъна. Му ляхин хьуд йисандин Сталинский программайиъ асас месэле вуди дивна. Дявдин зийнар сагъ апIбан ляхниъ ихь халкьар къирят кади лихура.
Учвуз му кагъаз бикIбан ич асас метлеб гьадму вуйич ки, учвура советарин халкьарихъди хьуд йисандин план тамам апIбаъ фици иштирак шулуш аьгъю апIуз ккундучуз.
Ихь уьлкейиъ хьуд йисандин планар тамам апIбан ляъниъ комсомол жаванари зурба хъуркьувалар хилиъ апIура. Учвура ужудар хъуркьувалар хилиъ апIувал ккун апIуруча.
М.МИРЗАБЕГОВ
А.ОМАРОВ
Полевая почта 61307 «в»
Хив райондин Яракк ва Къандикк гъулариан ву.
«Колхоздин уьмур»
№27 (852),
8 июль
1946-пи й.
Доска Почета
ВКП(б)—йин райкомдин ва райисполкомдин улупбиинди мягьсулар уч апIбаъ улихь хьайи колхозар гьюрматнан доскайиз йивуру.
1 ГьепIил гъулаъ Сталиндин цур али колхоз — председатель юл. Жавадов, парторганизацияйин секретарь юл. Балабегов.
2 Хюрикк гъулаъ Молотовдин цур али колхоз — председатель юл. Гереев, парторганизацияйин секретарь юл. Гьясанов.
3 Дарвагъ гъулаъ «Кр Октябрь» колхоз — председатель юл. Сулейманов, парторганизацияйин секретарь юл. Ахмедов.
4 Татил гъулаъ Максим Горькийдин цур али колхоз — председатель юл. Балабегов ибад, парторганизацияйин секретарь юл. Балабегов Гьяжи.
ФРОНТОВИК—ПРЕДСЕДАТЕЛЬ
Хив райондин Жвулли гъулан Мирзаев Гьяжимирза 1941—пи йислан мина ихь Ватандиинна хаин вуди гьюжум гъапIу алчагъ душманариз зербе йивури фронтдиъ иштирак гъахьну. 4—йисан душманарихъди Ватандин дявдиъ кчIиху Мирзаев 1945—пи йисан ноябрин вазли гъулаз гъафну. Гъулаз гъафири мугъу фронтдиъси колхоздиъра артугъ кьуввайиинди ляхин апIуз хъюгъну. Юл. Мирзаевдин марци зегьметди ва гужли тербияйи ва гьацира ляхниъ гужли упитди му ухти колхоздин руководител ляхнихьна за гъапIну. 1946-пи йисан февралин вазлилан ватан гъюуьвхю фронтовик Мирзаев Жвулли гъулаъ Ждановдин цур али колхоздин председатель гъахьну. Юл. Мирзаевди колхозникарин арайиъ гьаврикк ккаъбан ляхин яркьуди дивна. Августдин 3—пи числойиз колхоздин хярар уршвуб тамам гъапIну. Колхозникари чпин чимдин поставка вахтназ улихьна тамам апIбахъди колхоздизра кюмек тувну. Колхвзникари 42 кгр. чим кодхоздихъанди тувну. Омаров Исабегу 11 кгр., Мирзаев Къурбну 7 кгр. ва жарадари колхоздин чимдин поставка тамам апIбан бадали, колхоздиз чим тувну.
Колхоздиъ зегьметдин тербия дюзди тешкил апIбан ляхниъ юл. Мирзаевди чан вари кьувватар сарф aпIypa. Ждановдин цур али колхоздин колхозникар ва колхозник хпар чпин руководитель юл. Мирзаевдикан гизаф шадди ву.
М. Гьяжикъурбанов
«Колхоздин уьмур»
№32 (857),
10 август
1946-пи й.
