9-пи майдиъ, ихь вари уьлкейиъси, Дагъустандиъра, Ватандин Аьхю дявдиъ гъалибвал гъадабгъну 74 йис тамам хьпаз бахш вуди «Аьжалсуз полк» акция кIули гъябгъиди. Ихь республикайиъ му акция гъабхувал 2013-пи йисхъан мина аьдатнаъ убчIвна.

 

Майдин 7-пи йигъан «Дагъустан» РИА-йин конференцйир гъахру залиъ  «Урусатдин Аьжалсуз полкнан» РД-йиъ айи исполкомдин кIулиъ айи  Сабина Къурбанова ва региондин штабдин член Сефижат Мягьямедрасулова республикайин  СМИ-йин вакиларихъди гюрюшмиш гъахьну.

Сабина Къурбановайи къайд гъапIганси, Мягьячгъалайиъ «Аьжалсуз полкнан» иштиракчйир сяаьт йицIикьюбдиъ шагьрин кьялан майдандиин уч хьуз хъюгъди ва сяаьт кьюбдиъ гъягъювал ккебгъди. Инсанарин му десте Р.Гьямзатовдин кючейиъди, хъасин Леваневскийдин кючейиъди Пушкиндин кючейизкьан душну, гьадлин тина Родопский бульвариз удучIвиди. Улихьна йисариси дарди, гьаму йисан Дагъустандиъ му серенжемдин иштиракчйирин кьадар варитIан аьхюб шлуси ву.

Акцияйиъ гьарсар касдихьан иштирак хьуз шулу. Дявдиъ иштирак гъахьи абайин, эмдин, халуйин  ва жара багахьлуйирин шикил гъадабгъну, гьязур шулхьа. Эгер дявдин иштиракчийин шикил бицIиб вуш, республикайин фуну МФЦ-йиз вушра душну, думу пулсузди аьхю апIуз гъитуз шулу.

Инсанарин дестейиъ гизафси айидар яшлуйир ва бицIидар вуди шулу, хъа гьаму йисан гъалибвалин машкварра Рамазандин вазлиъ шулайивализ лигну, медицинайин кюмек тувуз шлу волонтерарин аьхю десте лазим вуйи дармнарра хьади гьязур дубхьна. Дестейихъди сабси  медицинайин  тяди кюмекнан машинра гьязурди хьибди.

«Гъачай», «Аьжалсуз полкнан» дестейиъ иштирак шулхьа. Дявдин иштиракчийин шикил хьтаршра, акцияйиъ иштирак хьуз шулу. Ихь Ватандин азадвал гъюбхю касариз гьюрмат апIувал ихь буржи ву»- гъапну Сабина Къурбановайи.