Гьар йигъан Табасаран райондин Хючнаарин гъулан кьялаъ айи паркдиз гъулариан яшлуйир уч шула. Улихьна йигъари узу мина алдахъиган, агьли касари «Табасарандин нурар» газатдин нубатнан нумра хиларигъ дибисну, газатдикан, диди ккадапIу ярхи ва баркаллу рякъкан гаф-чIал апIурайи.
«Цци ихь газат чапдиан адабгъуз хъюгъхъанмина 90 йис тамам дубхьна. 90 йис цIиб вахт дар, думу сар инсандин баркаллу уьмрин генрен ву. Гьаму вядайи райондиъ яшамиш шулайи агьалйирин уьмриъ ва жара ляхнариъ хайлин дигиш’валар гъахьну, ва дурар газатдин машариъ атIагури гъахьну, кIурайи яшлуйири.
Дурарин сюгьбатнягъ узура гъидикьнийза. «Табасарандин нурар» газатдин 90 йис хьувалихьна фици янашмиш шулачва, газатди ва районди ккадапIу уьмрикан фицдар фикрар кIваъ гъузнайичв? – суалнахъди илтIикIнийза уч духьнайидарихьна.
Дурарин арайиъ айи Хючна гъулан Цалак мягьялиъ яшамиш шулайи Абакар Гьяжиибрагьимовди улихь деврикан вуйи чан кIваин апIбар ашкар гъапIнийи.
«Узу Табасаран районтIан сад йисандитIан бицIир дарза. Табасаран район тешкил гъапIу садпи йисари узу набалугъ бай вуйза. Ич гагайи, дадайи ва гъуландари думуган апIру гафар, ихтилатар гьамусра йиз кIваин илмийиз. Дурари район тешкил гъапIган агьалйириз гъахьи гъулайваларикан, инсанарин уьмур ужувлахъинди дигиш шулайиваликан гизаф гафар-чIалар апIуйи. Мисалназ, дурарин гафариинди, совет уьлке хьайиз райондиъ миржибпи классдин ва кьялан образование айи касар адайи, гьаз гъапиш думуган Табасаран райондиз дахил шулайи гъулариъ кьюб ккергъбан мектебтIан ади гъахьундар. Думу мектебарра анжагъ девлетлуйирин баяризтIан дайи – нежбрарин баяриз аьгъювалар гъадагъуз мумкинвал ади гъабхьундар. Дурарин уьмур, чпин абйир-бабаринси, ипIру уьл бадали девлетлуйирихъ лихури гъябгъюри гъабхьну.
Узуз пуз ккундайиб гьадму вуйизки, Табасаран район тешкил гъапIхъанмина гъийин йигъаз райондин гъулариъ йирхьцIурилан зиина ккергъбан, бегьем дару кьялан ва кьялан мектебар, 40-рилан зина бицIидарин багъар, спортдин мектебар, больница, гъулариъ медицинайин ужагъар, культурайин хулар ва жара идарйир тикмиш гъапIну. Гъи, улихьдиси, райондиъ урхуз-бикIуз аьгъдрур амдар. Культура, экономика жигьатнаан район жарадарин кьяляхъ хъадар. Гизаф шад вуза. Дюз гъапиш, ихь уьлкейиъ гъахьи реформйирин дигиш’валари агьалйириз хайлин читинвалар гъахнийи. Яваш-явашди ужу шул кIури, миж кайиз. Хъа газатдин коллективдиз хъуркьувалар ва, улихьдиси, лизибдиз – лизиб, кIарубдиз – кIаруб кIури, лихури гъузуб ккун апIураза», – гъапнийи Абакар Гьяжиибрагьимовди.
Акъа гъул’ан вуйи яшлу кас Фятягь Ханмягьямедовдира улихь вахтар кIваин гъахнийи. «Йиз гъиси кIваин илмийиз, гъулариъ электрик аквар, машина хъаъру рякъяр адайи. Думуган гъулариъ машинарра адайи. Вари ляхнар хилихъди ясан, гьяйвнар, гамшар, йицар ккитIри, аьрабйирихъди тамам апIуйи, гьаддиз гъулариз гъи ухьуз айидарстар рякъяр лазимдира шулдайи. Дявдин кьяляхъна йисари Табасаран райондизра яваш-явашди гъагъ зигру ва жара машинар гъюз хъюгъю. Думуган райондин улихь-кIулихь хьайидари рякъяр тикмиш апIбан ляхнар кIули гъахуз хъюгъю.
Узу гьамци фикир апIураза: эгер увуз ихтибар гъапIу агьалйирин гъуллугънаъ шулдарш, дициб жавабдар ляхин кIул’ин гъадабгъну ккундар, гъадабгъхъанмина – думу баркаллуди кIулиз адабгъуз зегьмет дизигну ккунду. Газатдин коллективдира ерли гьюкмари апIурайи ляхнариз гьякьлу кьимат туври, халкьдин уьмриъ айи ужубдиканра, харжибдиканра бикIури ккунду», – чан дустран гафариз кюмек тувнийи Фятягь халурира.
Чухсагъул, агьли касар, насигьятнан гафариз. Иншаллагь, ич хил’ан гъюруб учура, газатдин журналистари, апIидича.
Хъа учву, гьюрматлу ватанагьлийир, «Табасарандин нурар» газатдиз вахтниинди подписка апIинай.
