6-7-пи августдиъ Табасаран райондиъ Кьалухъ Мирзайин ччвурнахъ вуйи спортдин фестиваль кIули гъябгъиди.
Футболиан, волейболиан, юкьяр дисбаан кьюд йигъандин талитар Хючна гъулаъ райондин стадиондиин ва Кьалухъ Мирзайин ччвурнахъ хъайи спорткомплексдиъ гъахиди. Талитарин иштиракчйир Кьибла Дагъустандин муниципалитетарин командйир ву. Фестивалин дахилнаъди, расвалин ляхнар ккудукIну, стадион ачмиш апIбан серенжемра гъабхиди.
Табасаран райондин глава Мягьямед Къурбановдин гафариинди, фестивализ республикайин улихь-кIулихь хьайи касар, РД-йин шагьрариан ва районариан делегацйир, гизаф кьадар тамаши хъапIрудар хялар хьиди.
Къайд апIуб лазим вуки, гьаму йисан майдин вазли жигьиларин ляхнариз лигру Федеральный агентствойи (Росмолодежь) гъубху грантарин конкурсдиз Низами Агъаризаевди «Кьалухъ Мирзайин ччвурнахъ вуйи фестиваль» проект адабгънийи. Грантарин конкурсдиъ дугъан проект гъалиб гъабхьну, ва фестиваль гьаму грантдин дакьатарихъ кIули гъабхиди.
