Урусатдиъ гъябгъюрайи йисан 4-пи августдиз официальный улупбариинди коронавирусдиан 18 636 741 кас аьзарлу гъахьну. Дурарикан 18 000 314 кас бегьемди сагъ гъахьну. Анжагъ гъубшу суткайиъ тазади иццру гъахьи 17 129 кас гьисабназ гъадагъна. Covid-19 диагноздиан гъийин йигъаз Урусатдиъ 382 560 кас гъийихну. ЦIийи жюрейин «кентавр» штаммдиан аьзарлу хьувалин 7 дюшюш гьисабназ гъадагъна.
Духтрарин, иммунологарин ва вирусологарин гафариинди, аьхиримжи вахтна вари дюн’яйиъ коронавирус нубатнан ражари яркьуди тарабгъуз хъюбгъна. Урусатдиъра, июлин вазлин кьялариан мина аьзарлу шулайидарин кьадар артухъ гъабхьну. Мидланра гъайри, коронавирусдин «омикрон» штаммдикан цIийи штамм «кентавр» арайиз дуфна. Лабораторйирин ахтармишари улупганси, COVID-19 уьзриз вакцина апIбан натижайиъ, инсандин ифдик думу уьзрихъди женг гъабхуз шлу антитела ачмиш шулу. Амма, инсандин иммунный гъурулушдин кьувватну ва деврин дармнари «омикрон» сагъ апIури гъахьнуш, «кентавр» штамм думу антителарихьан зяиф апIуз шуладар. Му штаммдиан бицIидарилан гъадабгъну кьаби инсанариина вари аьзарлу шула, гьадму гьисабнаан вакцина гъапIдарра. Амма вакцина гъапIдарин уьзур пучIуди улдубчIвуру. Гъийин йигъаз Урусатдиъ цIийи штаммдиан ургур кас аьзарлу духьна. Дурар вари Москвайиан ву.
Коронавирусдин «омикрон» штаммдикан тазади арайиз гъафи цIийи штаммдиз «кентавр» кIуру ччвур Нидерланды гьюкуматдин сагъламвалин Милли институтдин аьлимари тувну ва дидкан гъябгъюрайи йисан 13-пи июлиъ вари дюн’яйиз хабар дебккну. Улихьна му жюре штаммдиан аьзарлу гъахьидар Индияйиъ, Австралияйиъ, Германияйиъ, Великобританияйиъ, США-йиъ ва Канадайиъ ашкар духьнайи.
Коронавирусдихъди женг гъабхурайи духтрарин гафариинди, «кентавр» штаммдин вирусдин жюре аьзарлу гъахьирикан сагъу инсанарикна бицIи вахтнан арайиъ тарабгъура. Мисалназ «омикрондиан» аьзарлу гъахьидарин нефес хътабгъру гьендемартIан иццру шулдайи. Хъа цIийи жюрейин штаммди инсандин бедендин температура за апIуру, центральный нервный гъурулушдиз тясир тувру, пневмония ачмиш хьуз гъитру; кIул, улар иццру шулу. ИкибаштIан, вакцина дарапIдари ва яшлу касари му уьзрихьан ихтиятвал дапIну ккунду.
Медикарин фикриинди, гъи коронавирусдиз аькси вакцинайин рубар йивувал чарасуз лазим ву. Фукьан гъапишра, прививкайи уьзур зяиф ва гьииди сагъ апIуз мумкинвал тувра. «Кентавр» штаммдиан бицIидар рягьятди сагъ шула, амма дурари кьабидар айи хулаз уьзур хьади гъюра. ХъатIа гьаддиъ а.
