1-пи сентябриз Дагъустандиъ бицIидарин 15 багъ ва 4 цIийи мектеб ачмиш апIиди.
2-пи авгъустдиъ РД-йин Правительствойин заместитель Муслим Телякавовдин регьберваликкди цIийиди гьяракатнаъ ирчрайи объектар вахтниинди лицензияйихъди тямин апIбаз бахш дапIнайи совещание гъабхьну.
Совещаниейин эвелиъ дугъу улихь ккимиди тартиб дапIнайи «рякъюн картайиз» асас вуди, 2022-пи йисан 1-пи сентябриз 1606 деъру йишв ади 4 мектебдиз ва 2560 йишв ади бицIидарин 15 багъдиз лицензия тувну, ачмиш дапIну ккунивал къайд гъапIнийи.
Гьарсаб объектдин гьязурлугвалин гьякьнаан гюзчивал гъабхру тялукь гъуллугъарин ва мектебарна бицIидарин багъар тIаърайи муниципальный образованйирин вакилари мялуматар тувнийи.
Гьаци, кьюб цIийи мектеб Хасавюрт райондиъ, са-саб – Мягьярамкент ва Ахцигь районариъ ачмиш апIиди, хъа бицIидарин багъар – Гъяякент, Къумторгъала, Къяйтагъ, Къарабудагъкент, Казбековский, Хасавюрт, Табасаран, Къизилюрт районариъ ва Мягьячгъала, Каспийск, Дагъустандин Огни шагьрариъ.
Докладчикарихъ хъебехъну, Муслим Телякавовди бязи объектар улупнайи вахтназди тIаъбахьна гьязур апIбан читинвалар гъузрайиваликан гъапну. Гьадму гьисабнаан Ахцигь райондин Луткун гъулаъ 400 урхрудариз деъру йишвар ади ачмиш апIурайи мектебдиз шид зигбан месэла гьял дапIну ккудубкIурадар.
БицIидарин бязи багъарин гьякьнаанра гьял дапIну адру месэлйир гъузра. Мисалназ, Гъяякент райондин Сагаси-Дейбук гъулаъ 120 йишв ади тикмиш дапIнайи бицIидарин багъ ачмиш апIуз Роспотребнадзори ихтияр тувундар.
Вице-премьери гьюкмин жавабдар органариз, образованиейин гьарсаб тешкилатди улупнайи вахтнаъди бицIидар кьабул апIбан бадали гъабхурайи ляхниз гьяракат апIуб, хъа муниципальный образованйирин главйириз, тялукь документар къайдайиз хпан бадали, РД-йин образованиейинна илимдин министерствойиз шлубкьан ухди аьрза тувуб табшурмиш гъапIнийи.
