Экономикайин цирклиан Дагъустан Республикайин Главайин грантарин конкурсдиъ иштирак хьуз аьрзйир кьабул апIувал, 15-пи сентябризкьан давам хьибди кIури, республикайин экономикайинна аьтрафарин артмиш’валин министерствойин пресс-гъуллугънаан хабар тувра.

 

Тувнайи мялуматариинди, грантарин конкурсдиз вуйи проектар, республикайин экономикайинна аьтрафарин министерствойиъ кьабул апIура. Дагъустандин аьтрафариин экономикайин цирклиан ляхин апIурайи физический ва юридический касариз кIул’инди вая илмин коллективдихъди вушра, конкурсдиъ йисан саб ражаритIан иштирак хьуз мумкинвал адар.

Мидланра гъайри, му конкурсдин дахилнаъди, Дагъустандин экономикайин артмиш’вализ кюмек шлу проектаризра фикир тувди.
15-пи сентябрихъан, конкурсдиз хъадаънайи проектар ахтармиш дапIну кьяляхъ, 3 варитIан ужударсдар проектар гъядягъиди ва гьарубдиз 600 агъзур манат пул тувди.

Грантарин конкурсдиъ иштирак хьпан бадали, аьрза фу жюрейиинди абцIну, тувну ккундуш суалариз жаваб ва жара аьлава мялуматар РД-йин экономикайинна аьтрафарин артмиш’валин министерствойин сайтдиъ улупна. Сайтдиъ ичв суалназ жаваб дибрихъиш, 8 (8722)-67-19-89 телефондин нумрайиз зенг апIинай.