6–7-пи августди Табасаран райондин Хючна гъулаъ Кьалухъ Мирзайин ччвурнахъ вуйи республикайин дережайин спортдин фестиваль кIули гъубшну. Спортдин машквриз Кьибла Дагъустандин районариан ва шагьрариан, Мягьячгъалайиан хайлин хялар ва спортдин делегацйир гъафнийи. Табасаран райондиъ сабпи ражари гъябгъюрайи спортдин фестиваль тебрик апIуз Дагъустан Республикайин Главайин терефнаан Халкьдин Собраниейиъ айи вакил Нюсрет Уьмаров, Халкьдин Собраниейин депутат Алавудин Мирзабалаев, Къяйтагъ ва Хив райондин районарин кIулар Амир Темирбулатов ва Ярмет Ярметов, Дербент ва Избербаш шагьрин мэрар Рустамбег Пирмягьямедов ва Мягьямед Исакьов ва ж. дуфнайи.

 

 

 

Садпи йигъан лап дибдиан рас дапIну цIийи алапIнайи Хючна гъулаъ айи стадиондиин футболиан ва волейболиан Кьибла Дагъустандин муниципалитетариан дуфнайи командйирин арайиъ талитар ккергънийи.

 

 

Хъа асас серенжемар 7-пи августдиъ ккергънийи. ГвачIнинган цIийи алапIнайи стадион ва спортдин фестиваль официально вуди ачмиш апIбан серенжем кIули гъубшнийи.

Мярака ачмиш апIури, Табасаран райондин кIулиъ айи Мягьямед Къурбановди райондин вари агьалйир спортдин объект ишлетмишназ тувувалихъди тебрик гъапIнийи. Хъасин дугъу райондин жилариин гъябгъюрайи спортдин фетивалин эгьемиятлуваликанра гъапнийи. «Ухьуз рябкъюрайиганси, му спортдин фестиваль тамашичйири аьхю аьшкьниинди кьабул апIура. Гьаддиз мицдар фестивалар, дурариъ иштирак шулайи инсанарин кьадарра, фестивалин программайиъ улупнайи спортдин жюрйирин кьадарра артухъ апIури, чарйир зигури гьар йисан кIули гъахуб лазим ву», – гъапнийи Мягьямед Къурбановди.

Серенжемдиъ удучIвну гъулху хяларира Табасаран район цIийи стадион ачмиш апIувалихъди ва Кьалухъ Мирзайин ччвур али спортдин фестивалихъди мубарак гъапIнийи ва райондиз, ерли спортсменариз ва фестивалин иштиракчйириз хъана аьхю хъуркьувалар ккун гъапIнийи.

Райондин администрацияйин ку-льтурайин, спортдин ва туризмдин управлениейи ва Кь. Мягьямадовдин ччвурнахъ хъайи искусствйирин мектебдиъ урхурайидари уч духьнайидариз жикъи концертра улупнийи.

Хъасин улихь йигъан ккергъу футболиан финалин талитар кIули гъушнийи. 1-пи йишв бадали спортдин бягьснаъ СтIал Сулейман ва Хив районарин командйир учIвнийи, натижайиъ лезгйирин командайин устадвал ва гуж артухъ гъабхьнийи. Шубубпи йишван сагьиб Табасаран райондин футболистар гъабхьнийи.

Волейболиан турнир Кьалухъ Мирзайин ччвурнахъ хъайи спорткомплексдиъ кIули гъубшнийи. Финалиъ Табасаран райондин спортсменари Дагъ.Огни шагьрин командайин зиин гъалибвал гъадабгънийи, хъа шубубпи йишв СтIал Сулейман районди гъазанмиш гъапIнийи. Дупну ккундуки, Табасаран райондин волейболин командайин капитан Урусатдин волейболин чемпионатдин арсран медалин сагьиб, Дагъустан Респуликайин волейболин командайин член Садикь Уьсманов ву. Му касдин регьберваликкди Табасаран райондин сатIиди вуйи гьюлихъ гъумриин апIру волейболин команда Дагъустан Республикайин гьамусяаьтдин чемпион ву.

7-пи августдиъ Кьалухъ Мирзайин ччвурнахъ хъайи спорткомплексдиъ жигьиларин арайиъ юкьяр дисбаан талитарра кIули гъушнийи. Думу турнириъ Дагъустандин шагьрариан ва районариан 80-тIан зина жигьил спортсменар иштирак гъахьнийи. Бажаранлу табасаран жигьилари му спортдианра уьмуми 1-пи йишв гъазанмиш гъапIнийи, 2-пи йишв – Дагъ.Огни шагьрин, 3-пи йишв Къяйтагъ райондин спортсменари гъибисну.

Талитар ккудукIбан кьяляхъ гъалибчйир ва пешкешнан йишвар гъадагъу командйир ва спортсменар Табасаран райондин главайин заместитель Заур Мусаевди ва спортдин ветеранари кубкйирихъди, грамотйирихъди, медаларихъди, пулин конвертарихъди, кьиматлу пешкешарихъди лишанлу гъапIнийи.

Къайд дапIну ккундуки, Къалухъ Мирзайин ччвурнахъ вуйи спортдин фестиваль Табасаран райондин культурайин, спортдин ва туризмдин управлениейин дахилнаъ айи спортдинна туризмдин отделин начальник Низами Агъаризаевдин грантдин проектдин бинайиинди кIули гъубхуб вуйи. Жигьиларин ляхнариз лигру Федеральный агентствойин грантдиз вуйи жигьиларин проектарин конкурсдиъ гъалиб гъабхьи му проектдиз 1, 5 млн манат жара гъапIнийи. Проект кIули гъабхуз Табасаран райондин администрацияйира хайлин кюмек гъапIну.

«Спорт – уьмур ву! Спортдин гьаму машквру ихь республикайин районариан ва шагьрариан вуйи инсанар сатIи гъапIну. Къалухъ Мирзайин ччвурнахъ вуйи фестивали аьдати инсанаризра сатIи хьуз, чпин аьлакьйир мюгькам апIуз мумкинвал тувра», – гъапнийи Низами Агъаризаевди, фестивалин натижйир йивури.

Табасаран райондин Хючна гъулаъ цIийиди ачмиш гъапIу стадиондихьна хътакури, пуз ккундузузки, думу якьинди гележегдиъ райондин уткан уьмаратарикан саб хьибди. Газат урхурайидариз «халкьдин стадиондиз» кьюбпи уьмур фици тувнуш, кIваин апIуз ккундузуз.

2019-пи йисан стадиондиин дибдиан расвалин ляхнар гъахбан бадали, «Ерли жягьтлувалар» проектдиинди 7404,30 агъзур манат деебтнийи, гьадму гьисабнаан субсдйир – 5 млн манат, райондин бюджетдиан – 404,30 агъзур манат, меценатарин терефнаан – 2 млн манат. Мидланра савайи, «НЭМА» ООО-йи чан терефнаан пулсузди 440 метр манзилнаъ 4 метр яркьушин ади жаргъру рякъ’ин асфальт улубзнийи. 2020-2021-пи йисарира стадиондиин расвалин ляхнар давам гъахьнийи: цIийикIултIан 600 деъру йишвар тикмиш гъапIнийи, 20 деъру йишвар ади лигру хал цIийи алапIнийи, гургутум рукьан арчил илтIибкIнийи, стадиондин аьтрафар, аквар дизигну, албагнийи, стадион вуйибси 450 метр жаргъру йишвар тикмиш гъапIнийи.

2021-2022-пи йисари стадион дюз дапIну, дидин жил лазим вуйи къайдайиинди албагну, 100 метр ярхишин, 70 метр яркьушин ади табии дару чру майдан тикмиш гъапIнийи.

2021-пи йисан «Спортдин артмиш’вал» кIуру федеральный программайиинди РД-йин спортдин министерствойи райондиз 8483,21 агъзур манатдин 7700 кв. м (110х70) жилиин дирчру чру майданстар паласар тувну. Уьмумиди гъадабгъуруш, 2019-2022- пи йисари стадион къайдайиз хпан бадали 20 715,51 агъзур манат пул харж гъапIну. Вушра дапIну ккуни ляхнар хайлин ими. Стадиондин гъирагъдихъди ризиндин паласар ккирчну, жаргъру 4 зул айи рякъ тикмиш апIуз, гьацира спортсменариз ккуртар илдитру, маш-жан жибкIру йишвар, судйиризна прессайиз хулар хъади стадион вари терефарихъанди къайдайиз хуз пулин ва материалин хъана дакьатар лазим ву.
Гьаму ляхнар ккудукIбан бадали, Табасаран райондин кIулиъ айидар республикайин гьюкмарихьна илтIикIура.