Августдин 9-пи йигъан «ЦУР (регионарин идара апIру центр) гьяфтайин арайиъ» передачайиъ Дагъустандин тарифаринна энергетикайин министрин заместитель Мягьямед Аьлибеговдихъди прямой эфир гъабхьну.

 

 

Передачайиъ асас вуди республикайиъ кми-кмиди аквар кутIушвбан ва энергетикайин гъурулушдин кьувват мюгькам дапIну ккунивалин месэлйирикан гъулхнийи.
М. Аьлибеговдин гафариинди, аьхиримжи йицIбар йисарин арайиъ республикайин акварин гъурулушдин инфраструктурайин артмиш’валиъ ва думу деврин тIалабариз жаваб тувруси цIийи алапIувалиъ улупуз шлу аьхю дигиш’валар гъахьундар.

«Хьадан вахтна манишин артухъ шлуган, электроэнергияйиин гъурулушдин кьадартIан артухъ гъагъ алабхъура. КьадартIан артухъ аьлава гуж алабхъбаан электроэнергияйин симар ерцIуз хъюгъра. Думу жюре дюшюшарин натижайиъ хайлин йишвариъ кми-кмиди аквар кутIушвура. Вари гьаму месэлйир агьалйири ва карханйири электроэнергия ишлетмиш апIувал артухъ гъабхьивалихъди аьлакьалу ву. Дагъустан артмиш шули, хъа инфраструктура думу артмиш’валин хъяляхъ гъубзри гъабхьну», – къайд апIура М. Аьлибеговди.

Муштарйир ужуб ерийин электроэнергияйихъди тямин апIувал метлеб вуди, «Россети» ПАО-йи республикайин электросетарин комплекс мюгькам апIру программа тартиб гъапIну. Думу программайин бинайиинди кIули гъахру серенжемариз 7,7 млрд пул удубчIвуру.
Аквнахъди тямин апIру шубуб центриъ думу серенжемар аьхирихъна дуфна. Душвариъ дивнайи трансформаторар лапра кьувватлударихъди гьюдюхну.
«Думу ляхнар Мягьячгъала шагьрин, Гумбетовский райондин ва Бежтинский участокдин подстанцйириъ кIули гъухну. Багарихьди кьувват артухъ апIру трансформаторар Хасавюртдиъ ва Къизилюртдиъ гьюдюхиди. Программайиъ улупнайи серенжемар вари 2025-пи йисаз ккудукIуз планламиш дапIнача», – аьлава гъапIну Мягьямед Аьлибеговди.