Дагъустандиъ хьад маниб ву. Хьад улубкьбахъди яркврарик, гъеебццу укIак цIа кабхъувалин дюшюшарра артухъ шулу. Августдин 10-пи йигъан РД-йин Главайин Ситуационный центриъ кIули гъубшу Дагъустандин Главайин багахь хьайи чарасуз гьялнан дюшюшар ярхла апIбан ва цIа кабхъуваларин хатIасузвал тямин апIбан Комиссияйин заседание кIули гъубшну. Дидиъ цIа кабхъувалин, шид улубчIвувалин ва табиаьтдин жара хатIйирин профилактикайин месэлйир гьял гъапIнийи.
Видеоконференцияйин къайдайиъди заседание-йин ляхниъ РФ-дин МЧС-дин главайин теклифчи генерал-майор Андрей Мерзликиндира иштираквал гъапIну.
Заседаниейиъ къайд гъапIганси, аьхиримжи 30 йигъан республикайиъ 285 ражари цIа кабхъувалар гьисабназ гъадагъна. ЦIа кабхъувалин аьхюну пай дюшюшар инсандин вижнасузвалиан шула. Яркврарин аьтрафариъ цIа кабхъувалар электричествойин симариъ замыкание хьувалиан арайиз гъафну.
Мидланра савайи, республикайин кIулиъ айири штун ва туриствалин объектариин шулайи хатIа-балйирикан гъапнийи: инсанар гьюлихъна жикIуз гъягъру хьадан вахт ккебгъхъан мина республикайин гьюликк, даграрикк, нирарикк ккахъну 35 кас гъийихну, 41 сар касдиз кюмек тувну, ккадагъуз мумкинвал гъабхьну.
Республикайин Глава Сергей Меликовди къайд гъапIганси, региондин чарасуз гьялнан дюшюшариз лигру министерствойи гьадму жюре жара гъурулушарихъди сабси лазим вуйи уьлчмйир кьабул апIура. Гьаци, республикайиъ 2022-пи йис ккебгъхъанмина Саб вуйи держурныйвалин ва диспетчервалин гъуллугъариъ лихурайидарин кьадар 58 гъуллугъчийиинди артухъ дапIна. Амма ихь уьмрихъан, ихь табиаьт уьбхбахъан жавабдарвал ихь гъюнариин ал. Аьхюдарра, бицIидарра табиаьтдиз сейир апIуз удучIвган, цIа кабхъувалар арайиз дархбан, хъа цIа кабхъиш, ктIубшвбан къайдйирихъди танишди ккунду.
Хьадан фаслин вахтнаъ ватандашари гизафси гьюлик, нирик жикIури рягьятвал гъадабгъуру. Гьаддиз Сергей Меликовди Муниципалин образованйирин главйириз республикайин агьалйир ва хялар гизафси гъягъру йишварин хатIасузвал уьбхбаз артухъси фикир тувувал ккун гъапIну. Гьарсар главайиз, йишв’ина учв душну, аьгьвалат ахтармиш апIбан буйругъ тувну.
