10-пи августдиъ Дагъустан Республикайин Глава Сергей Меликов 2022-пи йисан дявдин вузар ккудукIу ва ихь республикайиз гъуллугъ апIуз гьаънайи офицерарихъди гюрюшмиш гъахьну.
Дурар офицервалин сабпи званйир гъадагъбахъди мубарак апIури, Главайи гъапну: «Учвуз ихь Урусатдин офицерар хьуб ва Ватандин азадвална асиллу дарувал гъюбхю дирбаш баяринна шубарин ляхин давам апIуб кьисмат гъабхьну. Умудлу вуза, ич республикайин аьтрафариин ккебгъу ичв гъуллугъ гъюзимбу гележегдиз ужуб тажруба хьибди».
Дагъустанлуйирин хасиятнан лишнарикан улхури, Сергей Меликовди кьягьялвал ва читинвалар аьх апIуз удукьрувал, гьякьлувал ва Ватандиз вафалувал асас лишнарси къайд гъапIну: «Дагъустанлуйир кюмекназ гъюз гьарвахтна гьязур ву. 1999-пи йисандин август-сентябрь вазарин гьядисйир, фици варихалкьарин террориствалин тешкилатарихьан Ватандин сяргьятар уьрхюз аьдати инсанар армияйин эскрарихъди ва офицерарихъди сатIиди дишлади женгназ гъудужвнийиш ихь ужуди кIваин илмийихь. ЦIийи Урусатдин тарихдиъ му халкьдин сабпи гьунарлувал гъабхьнийи», – гъапну Меликовди ва жигьил офицерарикан му кьягьялвалин аьдатар лайикьлуди давам апIуб тIалаб гъапIну.
Жигьил офицерариз насигьятнан гафар кIури гьацира Урусатдин ФСБ-йин РД-йиъ айи Пограничный управлениейин кIулиъ айи Андрей Карпенко ва Каспийский флотилияйин командующий Александр Пешков удучIвну гъулхнийи.
