Апрелин 26-пи йигъан чапдиан удубчIву «Табасарандин нурар» газатдин 17-пи нумрайиъ «Чемпион духьну, гъач» макьалайиъ узу ЮФО-йин ACB JJ турнириъ спортдин джиу-джитсу жюрейиан гъалиб гъахьи ва Урусатдин чемпионатдиз гьязур шулайи Марат Гьяжикъурбановдикан гъибикIнийза.
Дидиъ майдин 3-4-пи йигъари Москвайиъ спортдин му жюрейиан Урусатдин чемпионат кIули гъябгъруваликан дупнайи. Ихь ватанагьлийи макьалайин ччвурнаъ айи хаиш тамам гъапIну: дугъу Урусатдин 75 кило гъагъишин айи спортсменарин арайиъ чемпионвал гъазанмиш гъапIну.
Чемпионатдиъ сифте Марат Дмитрий Мюльчевойихъди кчIихуз удучIвнийи ва 8:0 гьисабниинди гъалиб гъахьнийи.
Хъасин Марат Гьяжикъурбанов Чечен Республикайиан вуйи Тамерлан Гучиговдиин (2:0), Архангельск шагьриан вуйи Александр Михайловдиин (5:0), хъа финалиъ Туркменистандиан вуйи Астах Зейнетдиновдиин (6:0) гъалиб гъахьну.
Гьамусяаьт Марат Гьяжикъурбанов джиу-джитсуйиан вари дюн’яйин чемпионатдиз гьязур хьуз хъюгъна. Душваъра ихь бай сарпир духьну гъюр кIури, умуд кивдихьа.
