Гьамусяаьт Табасаран райондин ЦIийи Лижв’арин, Гьемшнигъярин, Халгъарин, ТIюргъярин, ва Ягъдигъарин 1-пи ва 2-пи нумрйирин кьялан мек- тебариъ гьяракатниинди расвалин ляхнар кIулиъ гъягъюра. Мектебар капи- тально рас апIбан серенжемар «Дагъустан Республикайин мектебарин образованийин гъурулушар цIийи алаувал» региондин проект уьмриз кечирмиш апIури ва «Образованиейин артмиш’вал» кIуру Урусатдин государственный программайин дахилнаъди тамам апIурайидар ву.
Табасаран райондин администрацияйин пресс-гъуллугънаан тувнайи мялуматариинди, улупнайи мектебарикан 4 мектебдиъ капитальный рас апIбан ляхнар аьхирихъна дуфна. ЦIийи Лижв’арин ва Халгъарин мектебар рас апIбан ляхнар фици кIули гъягъюраш ахтармиш апIбан бадали, райондин глава Мягьямед Къурбановра улихьнаси гьадму гъулариз гъушну.
Йишварилан дуфнайи мялуматариз асас вуди, Халгъарин мектеб капитально рас апIбан ляхнар саки 99%-диинакьан тамам дапIна. Зиихъ къайд дапIнайи проектдиъ ва программайиъ иштирак хьпиинди мектебдин рябкъювал лап дигиш гъабхьну. Мушваъ вари айтIан ва чIатан ляхнар тамам дапIна ва гьацира, мектебдин гъваъра гьюдюхна. Мектеб ккудубкIну тувбахьна гьязур шула. Райондин главайи объектдиъ ахтармишар гъуху вахтна, ашкар гъахьи камивалар багарихьди дюз апIиди.
Хъа ЦIийи Лижв’арин гъулан кьялан мектебдин гьякьнаан кIуруш, мушваъра расвалин ляхнар аьхирихъна гъюра. Мушваъра мектебдин дарамат лап дигиш гъапIну.
1-пи сентябриз вари ляхнар тамам дапIну мектебдин раккнар баяр-шубариз арццбан бадали, Мягьямед Къурбановди мушваъ гъягъюрайи расвалин ляхнарихъан жавабдарвал гъабхурайи касдиз, гьяракатниинди уьлчмйир кьабул дапIну, объект аьхирихъна хувалин табшуругъар тувну.
«Му мектебарин расвалин ляхнар 99%-диинакьан ккудукIна. Имбудар анжагъ бицIи-бицIи ляхнар ву. Гьадрарра гьяракатниинди тамам апIура. АпIурайи ляхниъ варитIан асасубужуб ери ву, фицики бицIидар гьаму деврин шартIарихъди тямин дапIнайи, уччвуди кабалгнайи мектебариз душну ккунду. Гьаддиз цци райондиъ «Дагъустан Республикайин мектебарин образованийин къайдайин цIийивал» региондин проект уьмриз кечирмиш апIури ва «Образованиейин артмиш’вал» Урусатдин гьюкуматдин программайин дахилнаъди капитально рас гъапIу вари йирхьуб мектеб улихьган дивнайи мектебар вуйибкьан аьгъю шули имдар», – аьлава гъапIну райондин главайи.
Шиклиъ: Халгъарин кьялан мектебдин чIатIан рякъювал
