Хив райондин Хиварин гъулаъ жанлуди жюрбежюр жюрейин ляхнар кIули гъахура. Ктухури, кIуруш, гъулан кючйириъ рякъяр дюз алаура, дурариин асфальт улубзура, накьварилан илтIибкIнайи бару, рякъярихъди ккадахьнайи цалар таза алаура, штун кIулар ва булагъар рас апIура.

 

Гьаци, Юзбеговдин ччвурнахъ хъайи мягьлайиъ тракторихьди алдапIну, ужуб майдан хъапIна, ккадабхънайи 100 метрихьнакьан цал ккапIна, ва думу гьамус кабтIра. Му мягьлайиъ чвлиз Асккан булагъ дюз алапIиди ва мягьлайин кьюбиб терефариъра гъелемар кивди. КIули гъахурайи ляхнариз манигъвал туврайи газран турбара алдабгъну, мягьлайин зиъхъан терефнаан дубхна.

Гъулан администраци яйин кIулиъ айи Фахрудин Рамазановди зав’ан гъюрайи цIин ялавназ дилигди,ккергънайи ляхнар гъизгъинвалиинди аьхирихъна хура. Дугъу Яракк гъул’ан вуйи бригадайин баяриз чан ва гъулан агьалйирин терефнаан чухсагъул мялум апIура.

«Гьелбетда, сар йиз юкIв гъабхьну кIури, фукIа апIуз шулдар. АпIурайи ляхниз гъирагъдилан кьимат ва кюмек тувру, гьамци дарш, гьамци гъабхьиш ужуйи ву кIуру гъулан агьалйир хъайиган, улихькIулихь хьайирик юкIвра кубчIвру, ляхин апIурайи баяринра аьшкь шулу, ляхинра ккюдюбгъюри шулу. Хъа чухсагъул чпиз, гъулан агьалйириз. Садари пулин, садари гафнан, тмундари зегьметнан кюмекар туври, фукьан вушра ляхин улихь гъябгъюз гъитра. Гъит Аллагьди кьабул апIри ва гъазанмиш апIру жандиз мюгькам сагъ’вал туври! ЮкIв гъабхьиш, вари шулу. Мицдар агьалйирин кьувват имиди, гъулаъ гьарган чIиви ляхин гъабхидихьа», – гаф тувра Фахрудин Рамазановди.