Мягьячгъалайиъ уччвуди гаф-чIал апIбан устадвалин «AminaSchool» кIуру мектеб ачмиш гъапIну. Дидин тешкилатчира табасаран риш Асия Гьяжиева (шиклиъ) ву. Асияйи утканди улхуз улупру жюрбежюр курсар гъурхну, гьадму гьисабнаан Москвайин Шаболовкайиъ айи радиойинна телевидениейин мектебдиъра.

 

 

17-пи августдиъ Асияйи образованиейин чан проект уьм риз кечирмиш апIувалихъди аьлакьалу серенжем тешкил гъапIнийи. Душваз гафнан устадар, аьлимар, мялимар ва дугъан дустар уч духьнайи. Мушваъ удучIвну гъулхдари мялум гъапIганси, варидин улихь умудлуди улхувал, жюрбежюр инсанарихъди гаф-чIал апIуз аьгъювал, жвуван улхуб ккабалгувал уьмриъ гизаф лазим шулу. Аьдати мектебдиъ дицдар аьгъювалар туврадар, гьаддиз дилмаж’валин мектебдиъ игьтияж айивалиъ шак адар. Серенжемдиъ гьацира бабан чIал уьбхбан важиблуваликан, думу гъудубгиш, арайиз гъюз мумкин вуйи читинвалариканра гъулхнийи. Дуфнайидари Асияйиз му баркаллу ляхниъ чпин терефнаан кюмек тувуз, мектебдин ученикариз мастер-классар ва дурарихъди кми-кмиди хайирлу гюрюшар гъахуз, чпиз айи тажруба баяр-шубарихьна рубкьуз гьязур вуйиваликанра гъапнийи.

Гюрюшдин аьхириъ уч духьнайидари багъри чIалниинди шиърар ва мяълийир гъурхнийи.