22-пи августдиъ Табасаран райондин администрацияйин актовый залиъ райондин глава Мягьямед Къурбановди терроризмдиз къаршу комиссияйин заседание кIули гъубхну.
Заседаниейиъ АТК-йин вакилар, ихтиярар уьрхру органарин ва кьувватнан гъурулушарин кIулиъ айидар, райондин 22 гъулан советарин главйир ва гьацира жарадар иштирак гъахьнийи. Заседаниейиъ АТК-йин вакилар, ихтиярар уьрхру органарин ва кьувватнан гъурулушарин кIулиъ айидар, райондин 22 гъулан советарин главйир ва гьацира жарадар иштирак гъахьнийи.
Урусатдин Федерацияйиъ 2019–2023-пи йисари терроризмдин идеологияйиз къаршу серенжемар гъахбаан комплексный план ва 2022-пи йисан шубубпи кварталиъ НАК-дин, РД-йиъ айи АТК-йин ва Табасаран райондиъ айи АТК-йин къарарар фици тамам апIураш, цIийиди райондин главайин жямяаьтлугъ хатIасузвалин месэлйириз лигру заместитель Ринат Мирзабалаевди ктибтнийи.
Дугъан гафариинди, ццийин шубубпи кварталиъ райондиъ терроризмдин идеологияйиз къаршу ляхин гъабхбаан комплексдин пландиъ аьхю фикир профилактикайин серенжемариз тувра, иллагьки жигьиларин арайиъ, фицики экстремизмдин тясирнакк гизафси ккахьрайидар гьадрар ву.
Табасаран райондин образованиейин управлениейин кIулиъ айи Аьбдусалам Гьясановди ва Табасаран райондин ОМВД-йин начальникдин вахтназ вуди вазифйир тамам апIурайи Демирбег Аьгьмедовди образование-йин идарйирин 2022–2023-пи урхру йисаз айи гьязурлугваликан, мектебар цIа кабхъуваларихьан, 1-пи сентябриъ терроризмдин гьяракатарихьан уьрхбан бадали, сигнализацияйихъди ва видеойин гюзчивал гъабхбахъди тяминвал фициб вуш, ктибтнийи.
Заседаниейиъ гьацира Ярса ва ТIивак гъуларин советарин главйир ва Хюрикк гъулан советдин главайин заместитель удучIвну гъулхнийи ва 2022-пи йисан шубубпи кварталиъ Табасаран райондин жилариин экстремизмдин идеологияйиз къаршу ляхин гъабхбаан комплексдин план тамам апIбахъди аьлакьалуди чпин поселенйирин ругариин гъубху ляхникан ктибтнийи.
Заседаниейин натижйир йивури, райондин кIулиъ айи Мягьямед Къурбановди йишвариин агьалйирихъди вуйи сходар лазим къайдайиинди кIули гъахури адрувал къайд гъапIнийи ва гъулан советарин главйириз, августдин вазлиъ агьалйирихъди вуйи ляхин къайдайиз хуб ва гъуларин жямяаьтарин улихь чпи шубуб кварталин арайиъ дапIнайи ляхнин гьякьнаан отчет тувуб табшурмиш гъапIнийи.
Дугъу гьацира Украинайиъ кIули гъябгъюрайи хусуси метлеб айи операцияйиъ гъийихдарин гьюрматназ, дурари аьгъювалар гъадагъу мектебариъ игитар кIваин уьрхбан мармардашдин тахтйир керхувал тIалаб гъапIну, хъа АТК-йин комиссияйин вакилариз, йишвариина душну, урхбан йис ккебгъайиз образованиейин идарйирин ляхниъ имбу камивалар арайиан адагъуб табшурмиш гъапIну.
Жаради Мягьямед Къурбанов кьюбсан месэлайиин дийигънийи. Гъубшу жвумийиъ Хюрикк гъулан мистаъ динагьлийирин кьюб дестейин арайиъ гъудгнин кьяляхъ наразивалар ва натижайиъ гъярхьувалар гъахьну. Гъалмагълин иштиракчйирин арайиъ мясляаьт апIбан бадали, райондин кIулиъ айири тялукь органарин вакиларра жалб дапIну, кьюби терефарихъдира ляхин гъабхувал табшурмиш гъапIнийи.
Гьаддихъди сабси Мягьямед Къурбановди ТIивак гъулаъ айи медресейи фициб рякъюъди ляхин апIураш, республикайин муфтиятдин вакиларихъди сатIиди ахтармиш апIуб ккун гъапIну.
