Улихьнаси республикайин кIулиъ айи Сергей Меликов нубатнан ражари Украинайин аьтрафариин гъябгъюрайи хусуси метлеб айи дявдин операцияйиъ чпин буржи тамам апIури гъийихдарин абйир-бабарихъди гюрюшмиш гъахьнийи. Душваъ сержант Амир Наврузовдин адашди Сергей Меликовдихьна, чан балихъди сатIиди дявдиъ гъахьи дустрахьан вуйи кагъаз тувнийи ва думу варидариз ебхьруси урхуб ккун гъапIнийи.
Сергей Меликовди сержант Дяченкойи дагъустанлуйин игитваликан вуйи кагъаз гъурхнийи.
«Учу Украинайин Херсонский областдин Александровка гъулаъ хусуси метлеб айи операцияйин вазифйир тамам апIурайи вахтна, 24-пи майдиан 25-пи майдиз Украинайин Яракьлу кьувватари артиллерияйин яракьариан йивбар ккергъиган, гюзчивал гъабхурайи сержант Амир Исабегович Наврузовди вахтниинди учуз «Гьавайиан хатIа гъюра! Жин йихьай!» команда тувнийи ва гьаддиинди учу аьжлихьан гъюрхнийи.
Гьамцир игит бай дюрхну, дугъаз тербия туву абйир-бабариз чухсагъул пуз ккундузуз», – дибикIнайи кагъзик.
Кагъаз дурхну ва Исабег Наврузовдиз башсагълугъвал ккун дапIну, Сергей Меликовди чав дагъустанлуйин гьунарназ икрам апIурайиваликан гъапнийи. «Пуз ккундузузки, ихь Дагъустандиан гъушу вари баярикан, гьам гъийихдариканра, гьамсан гьамусяаьт чпин буржи тамам апIури, Украинайиъ айидарикан, гьамцдар кагъзар дидикIна. Ихь уьлкейин вари эскрари чпин буржи лайикьлуди тамам апIура, хъа вушра сабпи нубатнаъ жвуван жан фида апIури, игитвал улупурайидар ихь элугълийир, ичв баяр ву. Гьаз гъапиш учву дурар игитарси тербияламиш гъапIунчва, ва дурар халис ватанперверар ву», – къайд гъапIнийи республикайин кIулиъ айири.
***17-пи августдиъ Табасаран райондин Глава Мягьямед Къурбанов Украинайиъ кIули гъябгъюрайи хусуси метлеб айи операцияйиъ гъакIи ЦIурутIил гъулан агьали Амир Исабегович Наврузовдин адаш Исабег Наврузовдихъди гюрюшмиш гъахьну. Гюрюшдиз дуфнайидари Амир Наврузовдин адашдиз башсагълугъвал ккун гъапIнийи.
Мягьямед Къурбановди къайд гъапIганси, гъира Украинайиъ хусуси метлеб айи операцияйиъ гизаф табасаран жигьилари чпин эскервалин буржи намуслуди тамам апIура. Дугъу дявдиъ баяр гъакIи хизанариз райондин администрацияйин терефнаан лазим вуйи кюмек тувуз гьязур вуйиваликан, республикайин Глава Сергей Меликовди дицистар хизанарихъди гюрюшмишар тешкил апIурайиваликан, гьацира гъакIи эскрарин хизанариз кюмек тувбан бадали хусуси Фонд яратмиш дапIнайиваликан гъапну. Дидланра савайи, хусуси метлеб айи операцияйиъ гъийиху баярин гьюрмат уьбхбан бадали, дурар яшамиш шули гъахьи гъуларин кючйириз дурарин ччвурар тувбан къарарра адабгънача, хабар тувнийи Мягьямед Къурбановди.
Дидин кьяляхъ Табасаран райондин военный комиссар Садикь Мурадялиевди Урусатдин Президентдин 2022-пи йисан 15-пи июлиъ 85426-пи нумрайихъан адабгъу Указдихъди вуйи мялуматнан кагъаз гъурхнийи: «Эскервалин гъуллугъ тамам апIурайи вахтна кьягьялвал, дирбаш’вал ва фидакарвал улупбаз лигну, сержант Наврузов Амир Исабегович «Кьягьялвалин ордендихъди» (йикIбан кьяляхъ) лишанлу гъапIну».
Мягьямед Къурбановди балин орден Исабег Наврузовдихьна тувну.
Аьлава вуди къайд апIуз ккундузуз, Амир Наврузов 2015-пи йисан 22-пи январи Урусатдин Президентдин 0589-пи нумрайин Указдиинди Жуковдин медалихъдира лишанлу дапIна.
Аьхиримжи вахтари Исабег Наврузовдиз чан балин Украинайиъ хусуси метлеб айи операцияйиъ иштирак шулайи дявдин дустарихьан – аьхюнур сержант Павел Ладеевдихьан, механик-водитель, ефрейтор Александр Вересовдихьан, пулеметдиан йивру рядовой Азамат Берикемовдихьан, аьхюнур матрос Ренат Дуяковдихьан, разведка гъабхру ротайин аьхюнур разведчик Иван Дяченкойихьан ва жарадарихьан – саб-швнуб кагъаз дуфна. Мурар вари Амир гъакIи йишван – 24-пи августдиан 25-пи августдиз – дугъахъди сатIиди Херсонский областдиъ Александровка кIуру гъулаъ разведкайиъ айидар вуйи, гьаддиз дурари чпин кагъзарик туврайи мялуматарра садар ву. ВСУ-йи артиллерияйин яракьариан гюлле уьлюбхюз хъюгъюбси, гъаравлиъ дийигънайи Амири дустариз, жин йихьай, кIури команда тувнийи, ва дурар вари дишлади жилиина ккатIархьнийи. Амири дустар зиълан чан бедендихъди илиркнийи ва тIуркIурайи минйирихьан гъюрхнийи, учвсан, лап гъагъи зийнар духьну, али йишв’ин гъакIнийи.
«Амири, халис игитриси, чан кьягьялвал улупну. Дугъу учу ва Ватан бадали чан уьмур тувну. Аьхю чухсагъул пуз ккундучуз учвуз, Амирин абйир-бабариз, гьамцир игит бай уьрхбаз», – гафариинди ккудукIура вари кагъзар.
