29-пи августдиъ «Ачухъ гьюкум» проектдин дахилнаъди «Дагъустан» РИА-йин пресс-конференцйир гъахру залиъ Дагъустан Республикайин цифровой артмишʼвалин министр Юрий Гьямзатов республикайин махлукьатлу мялуматарин дакьатарин вакиларихъди гюрюшмиш гъахьну. Дугъу «Кавказ-2022» РИФ форумдин натижйирикан, республикайин районариъ цифровизацияйин месэлйирикан, ляхниъ алахьурайи читинваларикан ктибтнийи.

Министри къайд гъапIганси, ригъ алабхъру терефнан уьлкйири Урусатдиз аькси санкцйир илитIнайивалихъди аьлакьалу вуди, Урусатдин идарйир багарихьди ихь уьлкейин программный тяминвалихъна гъюбанди ву. Ихь уьлкейин программный тяминвал хъуркьувалиинди артмиш шула ва улихь гъябгъюра. Гьаму йисан министерствойи урусатдин IT цирклиъ лихурайи пишекрарихъди йикьрар йитIбан натижайиъ, Мягьячгъалайин ва Каспийск шагьрарин швнубна саб мектебдиъ «Ред Софт» цийи программа ляхник кипна.

Республикайиъ «2.0 Цифровой барабарвал тямин апIувал» программа уьмриз кечирмиш апIури, гъуларин администрацйир, ФАП-ар, мектебар, культурайин идарйир, библиотекйир интернетдихъди тямин дапIна, гьаддихъди сабси телефондин аьлакьайин точкйирра ачмиш апIувал планламиш апIура. «2030-пи йисаз уьмриз кечирмиш апIурайи программайин дахилназ 543 гъул гъадагъна, гьадрарикан 44 гъулаъ гьаму йисан вари ляхнар тамам апIиди», — гъапну Юрий Гьямзатовди.

Министри гьацира, ихь уьлкейиъси, республикайиъра IT циркил артмиш апIбан бадали яркьу мумкинвалар ачмиш дапIнайиваликан, карханйириз, пишекрариз льготайин программйир арццнайиваликан гъапнийи.