Уьлкейин Президент Владимир Путинди къул дизигнайи къанун-къайда гюзет апIури, Хив райондин мектебарин гьяятариъ урхбан цIийи йисахьна Урусатдин Федерацияйин ва Дагъустан республикайин пайдгъар дурсра.
Пайдгъар вари урхбан йисан гьар итни йигъан, гьяфта абццру линейкайиъ, сифте Урусатдин, хъасин Дагъустандин гимнарихъди за апIиди, хъа киш йигъан, гьяфтайин натижйир йивури, дурар ис апIиди.
Гьар гьяфтайиъ пайдгъар за апIбан асас метлеб – аргъаж шулайи насларин Ватандихьна вуйи рафтар ва дидхъан юкIв убгувал заан дережайиз хуб, дурарин ватанпервервалин гьиссар жанлу апIуб ву.
Сабсан цIийивал гьаддиъ аки, мектебариъ гьар гьяфтайин итни йигъандин сифте дарс классдин сяаьт хьибди. Думу сяаьт, линейкайиин вуйи хьуб-йицIуб дакьикьайин ара ктарди, гьарсаб классдиъ дидин руководители кIули гъабхиди.
Му классдин сяътиз «Важиблу вуйибдикан сюгьбатар» кIуру ччвур тувна. Дидин дахилнаъди классарин руководителари урхурайидарихъди жюрбежюр пишекарвалин рякъяриъ ва цирклариъ лихурайи касарихъди, зегьметнан ветеранарихъди гюрюшар тешкил апIиди.
