Август вазлин аьхирариъ Табасаран ва Хив районариъ мялимарин августдин конференцйир кIули гъушну. Дина мектебарин директорариз ва дурарин заместителариз, классдин гъирагъдиъ гъабхру ляхнин тешкилатчйириз, жигьил мялимариз, методобъединенйирин кIулиъ айидариз, урхурайидарин абйир-бабарин комитетдин вакилариз ва бицIидарин багъарин заведующйириз теклиф дапIнайи.
Табасаран райондиъ…
… конференция Хючнаарин сабпи нумрайин лицейин актовый залиъ 25-пи августдиъ кIули гъубшну. Серенжем жикъи улхбиинди Табасаран райондин глава Мягьямед Къурбановди ачмиш гъапIнийи.
«Ццийин Аьгъюваларин машкврихьна ухьу образованиейин артмиш’валин цирклиъ хайлин ужудар хъуркьувалар ади дуфнахьа, гьадму гьисабнаан «Образованиейин артмиш’вал» программайиинди райондиъ 6 мектебдин – Гьемшнигъарин, ЦIийи Лижв’арин, Халгъарин, ТIюргъярин ва Ягъдигъарин сабпи ва кьюбпи нумрайин кьялан мектебарин – дараматар дибдиан рас гъапIунхьа. Аьхиримжи йисари, уьмумиди гъадабгъиш, республикайин ва федеральный программйириинди Табасаран райондиъ 36 мектеб бинайиан рас дапIна», – мялумат тувнийи райондин главайи.
«Ккудубшу урхбан йисандин натижйир ва цIийи урхбан йисан мектебарин педагогический коллективарин улихь дийигънайи месэлйирин гьякьнаан» доклад хьади образованиейин управление-йин кIулиъ айи Аьбдусалам Гьясанов удучIвну гъулхнийи. Дугъу чан докладдиъ райондин образованиейин цирклиъ аьхиримжи йисари гъягъюрайи дигиш’валарикан ктибтнийи.
Образованиейин управлениейин кIулиъ айирин гафариинди, райондин метебарин материалинна техникайин бина мюгькам гъабхьну; мялимари чпин ляхниъ цIийи технологйир ишлетмиш апIура, урхурайидар ЕГЭ-йихьна ва ГИА-йихьна гьязур апIбан рякъ’ан хайлин хъуркьувалар гъазанмиш дапIна; райондин мектебарин вакилар лайикьлуди республикайин конкурсариъ ва олимпиадйириъ иштирак шула. Гьаддихъди сабси, мектебариъ тербия тувбан ляхинра заан дережайиз дубхну ккунду, ва 1-пи сентябрихъан-мина мектебариъ тербия тувбан цирклиан «директорин насигьятчи» гъуллугъ ачмиш апIували му терефра улихь гъабхуз мумкинвал тувди, умуд кивнийи дугъу.
Чан докладдин аьхириъ Аьбдусалам Гьясановди райондиъ айи вари мектебар 1-пи сентябриъ урхурайидар кьабул апIуз тамамди гьязур вуйиваликанра гъапнийи.
Совещаниейиъ гьацира Аь. Тахо-Годийин ччвурнахъ хъайи ДНИИП-дин директорин заместитель Низами Сафарялиев, Дагъустандин образованиейин артмиш’валин институтдин проректор Аьгьмед Къурбанов, Дербент шагьриъ айи педколледждин директор Шарафутдин Сейидов, РД-йин Халкьдин Собраниейин депутат Алавудин Мирза-балаев удучIвну гъулхнийи. Мурари уч духьнайи образованиейин гъуллугъчйир ккебгърайи Аьгъюваларин йигъахъди мубарак гъапIнийи ва дурариз мюгькам сагъ’вал, уьмриъ хушбахтвал, ляхниъ хъуркьувалар ккун гъапIнийи.
Табасаран райондин гимназияйин директор Элина Ших-мягьямедовайи уч духьнайи гъарашугъар шубубпи наслин ФГОС-дин тIалабарикан, дурариз асас вуди мялимарин ляхниъ тIаърайи цIийиваларикан ктибтнийи, хъа дугъан заместитель Зарифат Къараха-новайи чан ляхнин тажрубайиан мисаларра хури, бицIидарин багъарин ляхин фици ужу алапIуруш, уч духьнайидариз мялуматар тувнийи.
Совещаниейин аьхириъ чпин ляхниъ тафавутлу гъахьи саб жерге мялимариз ва образованиейин цирклиъ лихурайи гъуллугъчйириз РД-йин образованиейин министерствойин медалар ва райондин главайин терефнаан гьюрматнан грамотйир тувнийи.
Хив райондиъ
… мялимарин конференция 29-пи августдиъ Хив райондин культурайин хулаъ кIулиъ гъубшну.
Уч духьнайдарин улихь Хив райондин глава Ярмет Ярметов, райондин депутатарин собраниейин председатель Садикь Исрафилов, РД-йин Халкьдин Собраниейин депутат Расим Гьяжиагъаев, образованиейин отделин кIулиъ айи Назаряли Тарланов ва методкабинетдин методист Марат Межидов удучIвну гъулхнийи.
Дурари уч духьнайидар улубкьнайи 2022-2023-пи урхбан йисахъди тебрик гъапIнийи, цIийи урхбан йисан образованиейин цирклиъ духьнайи дигиш`валарикан гъапнийи. Гьацира, урусатдин «Мектебарин образованиейин гъурулушар цIийи алаувал» программайин шилнаъди Гъвандккарин ва ЦIийи Фрюгъярин мектебариъ гъуху дибдиан рас апIбан ляхнарикан, имбу мектебариъ 1-пи сентябрихьна дапIнайи гьязурлугваларикан ктибтнийи. Презентация саягъниинди конференцияйин иштиракчйир Сюгют ва Ургъа гъуларин мектебариъ «Точка роста» проектдин дахилнаъди арццрайи кабинетарихъди, 1-пи ва 5-пи классариъ духьнайи ФГОС-дин цIийи тIалабарихъди таниш гъапIнийи.
Конференцияйиъ ккудубшу урхбан йисандин аьгьвалатнан шикил ачмиш апIури, райондин мялимар пишекарвалин дережа за апIру курсариъ иштирак хьувалин, дурари сабпи ва заан дережайин категорйир гъазанмиш апIувалин ва айи категорийир нубатнан ражари тасдикь апIувалин натижйир гъивнийи, Урусатдин ва республикайин образованиейин министерствйирин, РФ-дин мярифатнан министерствойин терефнаан грамотйириз, дип-ломариз, гьюрматнан ччвурариз ва медалариз сагьиб гъахьи мялимарикан, жюрбежюр олимпиадйириъ ва конкурсариъ, гьацира ВПР-риъ ва ГИА-йиъ урхурайидари улупу хъуркьуваларикан гъапнийи.
Конференцияйин аьхириъ, ккудубшу урхбан йис заан хъуркьувалар ади ккудукIу ва ГИА-йиан заан балар гъадагъу баяр-шубариз дарс киву мялимар Ярмет Ярметовди райондин администрацияйин терефнаан чухсагъул мялум апIру кагъзариинди лишанлу гъапIнийи.
