РД-йин Муфтият Иса Пайгъамбрин (с.аь.в.) ччвурнахъ хъайи Духовный центр ва Мягьяммад Пайгъамбрин (с.аь.в.) ччвурнахъ хъайи республикайин мист тикмиш апIбаъ кюмек тувуб ккун апIури, республикайин кIулиъ айирихьна илтIикIнийи. Дагъустандин Правительствойин председатель Аьбдулмуслим Аьбдулмуслимовди 31-пи августдиъ, РД-йин Глава Сергей Меликовдин табшуругъниинди, гьаму месэлйириз бахш дапIнайи совещание гъубхну.

 

 

Премьер-министри къайд гъапI-ганси, РД-йин Правительствойи Духовный центрихьна гъюрайи рякъ рас апIбан, коммунальный инфраструктурайин документар къайдайиз хпан ва хъана жара тялукь ляхнарин кюмек тувбанди ву.

«Му дарамат неинки ихь республикайиъ, хъа гьацира дидин гъирагъарихъра культурайинна тарихдин ва рюгьнанна эдублувалин аьхю эгьемият айиб ву. Дагъустандин Глава Сергей Меликов швнуб-саб ражари думу тикмиш апIурайи йишвахьна гъушну, ва дугъу шлубкьан ухди думу ккудубкIувалин важиблуваликан гъапну. Духовный центр гьякьлуди халкьдин тикилиш дубхьна, думу Дагъустандиан, Урусатдиан, вари дюн’яйиан инсанари туву садакьйирин, спонсорвалин пулин ва жара лазим вуйи алатарин, техникайин кюмекниинди тикмиш апIурайиб ву. Центр тикмиш дапIну ккудубкIну адаршра, дидин аьтраф шагьристанари рягьятвал йивру йишв дубхьна», – гъапну Аьбдулмуслимовди.

Совещаниейин иштиракчйири му месэла шлубкьан ухди гьял апIбаан чпин теклифар ачухъ гъапIнийи.