1923-пи йисан 8-пи сентябриъ Дагъустандин Хунзах райондин ЦIада гъулаъ Расул Гьямзатов бабкан гъахьну. Накь республикайиъ Дагъустан халкьдин машгьур шаир Расул Гьямзатовдин 99 йис тамам хьувал къайд гъапIну.
КIваина хурача, шаир бабкан гъахьихъан мина 100 йис тамам шулайивализ дилигну, 2023-пи йис Расул Гьямзатовдин йис вуди мялум дапIна. Дагъустан Республикайиъ Расул Гьямзатов бабкан гъахьи-хъанмина 100 йис тамам хьпаз бахш вуйи серенжемар кергъна. Региондиъ Варихалкьарин «Лизи кьарнийирин йигъар» Гьямзатовдин литературайин фестиваль ачмиш гъапIну.
Литературайин асас серенжем Поэзияйин театрин гьяятдиъ Дагъустандин халкьдин шаир Расул Гьямзатовдиз бахш дапIнайи ядигарихъ кюкйир дивбалан ккебгъну.
Мягьячгъалайиъ Поэзияйин театриъ «Гъулан ва планетайин шаир» шикларин выставка ачмиш дапIна. Шикларин выставкайиъ Гьямзатовдихъди, дугъан хизанарин вакиларихъди, дустарихъди, машгьур касарихъди вуйи гизаф кьадар шиклар а.
7-пи сентябриъ Урусатдин писателарин Союздин председатель Николай Иванов кIулиъ ади Урусатдин писателарин Союздин пленум ачмиш гъабхьну. Дидиъ уьлкейин гизаф регионариан, харижи уьлкйириан шаирар, писателар иштирак гъахьну.
«Расул Гьямзатовдин ччвурнахъди аьлакьалу вуди Поэзияйин театриъ гъягъюрайи серенжемар гизаф важиблу вучуз. Думу бабкан духьну 100 йис тамам хьпаз бахш вуйи йигъинжагъ Урусатдин писателарин Союздин пленумдилан ккергъну», – гъапну поэзияйин театрин директор Елена Гаруновайи.
Урусатдин писателарин Союздин председатель Николай Ивановди къайд гъапIганси, Расул Гьямзатовдин юбилейиз бахш вуди «Расул Гьямзатовдин 100 йис» почтайин марка адапIиди, хъа селекцияйин федеральный центрин пишекрари «Лизи кьарнийир» кIуру цIийи жинснан лизи беъли адабгъиди.
8-пи сентябриъ поэзияйин Театриъ Расул Гьямзатовдин шиърар урхбан «Ачухъ микрофон» серенжем гъабхьну, Урусатдин позияйин вечер кIули гъубшну, хъа 9-пи сентябриъ фестивалин иштиракчйир Дербентдиз, шаирин багъри Ватан Хунзах райондин ЦIада гъулаз, «Лизи кьарнийир» ядигар дивнайи Гунибдиз гъягъбанди ву.
