Хив райондин кьял’ан удучIвган, Хив, Чювекк, Ккугъ ва Яракк гъуларин сяргьятариин рякъ-хулиъ, чIат-чIурдиъ айи касариз гъудган апIуз сабсан мист дивра. Ляхин, гьавйириз дилигди, жанлуди кIули гъябгъюра.

 

Ухьухь мист Аллагьдин хал ву, кIури шулу. Му агъалин мяна гьисабназ гъадабгъну, Хив райондиъ ва райондиан гизаф йисар улихьна удучIвну душнайи табасаран ва лезги агьалйири чпин WhatsApp-дин, Telegram-дин машариъ ва статусариин тикмиш апIурайи мистан шиклар, тикилишдин гьякьнаан мялуматар туври, жара миллетарин вакилар пулин дакьатар уч апIуз жалб апIура.

Мидланра савайи, йигъан райондин саб гъулан имам, цалин устйир ва жямяаьт хъади тикилишдин ляхнариъ иштирак шули, 6 метрна гьацI ярхишин, 5 метрна гьацI яркьушин ва 3 метр ягълишин алди, жилариз ва дишагьлийириз гъудгнин жикIру, жа-жаради чIатинди гъяру йишварра хъади дебккрайи мистан дарамат гьацIкьялариан адапIна.

Хив райондин имамарин советдин председатель Шябангьяжи Салигьовди кепкииндикьан му баркаллу ляхниз кюмек гъапIу гьарсар касдиз аферин мялум апIура.