Дагъустандин агьалйириз улихьган, коммунальный игьтияжарихъан пул тувбан бадали, ЖКХ-йин идарйириз душну, ярхи нубатнахъ дийигъувал алабхъуйиш, гьамус дурарихьан му ляхин жвуван хул’ан удудучIвди, кIулиз адабгъуз шулу. Лазим вуйиб жвуван телефондиъ ГИС ЖКХ приложение ибтуб ву. Приложениейин хусуси кабинетдиъ лазим вуйи мялуматар тIаиган, агьалйирихьан чпи фукьан акв, газ, шид харж гъапIнуш лигуз, комуслугйирихъ тувну ккуни пулин зиин гюзчивал гъабхуз шулу, газран, аквнан приборарин улупбар душваъ жвувхьан тIауз шулу.
Гьаму мялумат улихьнаси «Ачухъ гьюкум» проектдин дахилнаъди журналистарихъди гъабхьи конференцияйиъ Дагъустан Республикайин гьюкуматдин яшайишдин хулар-йишварин инспекцияйин (Госжилинспекция) кIулиъ айи инспектор Сергей Касьяновди тувнийи. Госжилинспекцияйин асас вазифа, кIваин апIураза, республикайин ЖКХ-йин месэлйириз лигувал, гизаф мертебайин хулар лазим вуйи шараитарихъди тямин апIувалиин гюзчивал гъабхувал ву.
Сергей Касьяновди къайд гъапIганси, гьар йигъан Госжилинспекцияйин «убцру линияйиз» агьалйирихьан 180-200 аьрзйир кайи зенгар гъюра. ВаритIан гизаф аьрзйир аквар ктIушвбан гьякьнаан ву. ИкибаштIан, лазим вуйи къайдайиинди агьалйир электроэнергияйихъди тямин апIури адрувализ лигну, саки гьар йигъан «Россети Северный Кавказ» – «Дагэнерго» ПАО-йин журумарра апIура.
«Эгер учвуз туврайи электроэнергия ужуб ерийин дарш, кми-кмиди аквар ктIушвури-кархьбаан хулаъ айи техникайиз зарар гъабхьнуш, кьюр шагьидариз, гьадму гьисабнаан идара апIурайи компанияйин сар вакилизра, дих дапIну, гъабхьи зарарнан акт дапIну ккунду. Хъасин, лазим вуйи документар гьязур апIбалан кьяляхъ, электроэнергияйихъди тямин апIурайи тешкилатдилан суддиз тувуз шулучвхьан», — гъапну Сергей Касьяновди.
Мидланра гъайри, пресс-конференцияйиъ 2022-2023-пи йисарин кьюрдун вазарихьна гьязур хьувалин гьякьнаанра гъулхнийи. Сергей Касьяновди туву мялуматариинди, гъийин йигъаз республика гьелелиг хулариъ цIийир тIаъру чвлинна кьюрдун фаслихьна анжагъ 86 процентдинтIан гьязурди адар.
«Кьюрдухьна гьязур хьувалин ляхнар республикайин Правительствойин гюзчиваликк кка: хулариъ цIийир тIаъру чвлинна кьюрдун фаслин ляхнар тамам апIбан гьякьнаан вуйи оперштаб тешкил дапIна. Оперштабди, улупнайи вахтназ тамам дапIну ккуни ляхнарин план гьарсаб муниципалитетди кIулиз адабгъувалин зиин ижмиди гюзчивал гъабхура. Кьюрдун вазарихьна гьязур хьпан ляхнин сабпи пай 15-пи сентябриз ккудубкIиди. Гьарсаб гизаф мертебайин хал кьюрдухьна гьязур хьувалин, ляхнар аьхирихъна гъюбан кьяляхъ туврайи паспорт ГИС ЖКХ-йин гъурулушдиъ атIабгну ккунду. Гьамциб жюрейиинди дюзмиш дапIнайи паспорт республикайин гьарсаб муниципалитетдиз лазим ву.
Дарпиди гъибтуз шулдар, магьа швнуд йис ву Дагъустандин Огни шагьрихьан вахтниинди вари ляхнар тамам дапIну, кьюрдухьна гьязур хьувалин паспорт гъадабгъуз даршули. Вушра, сабан гьеле вахт ими. 15-пи сентябриз вари шагьрари ва районари, улупнайи пландиинди ляхнар тамам дапIну, гьязурлугвалин паспортар ГИС ЖКХ-йин гъурулушдиъ атIагиди кIури, умуд кивраза», – аьлава гъапIну Сергей Касьяновди.
