Сентябрин 5-пи-8-пи йигъари Владивостокдиъ Восточный экономический форум (ВЭФ) кIули гъубшну. Владивостокдиъ форумдин варитIан асас гьядиса – Урусатдин Президент Владимир Путин пленарный сессияйиъ удучIвну улхувал гъабхьну.
ВЭФ-дин дахилнаъди кIули гъубшу пленарный сессияйиъ Урусатдин Президент Владимир Путинди гъапну: «Владивостокдиъ гъабхьи гюрюш-дюн’яйин экономикайиъ арайиз дуфнайи аьгьвалатназ кьимат тувуз, арайиъ айи месэлйирикан, хатIйирикан улхуз ужуб мумкинвал ву…»
Къайд апIувал лазим вуки, ВЭФ – 2015-пи йисхъан мина Владивостокдиъ Русский кIуру островдиин али Урусатдин варихалкьарин форумар гъахру чIатху майднарикан саб ву.
Востокдин форумдин майдандиъ Урусатдин ярхла ригъ гьудубчIвру региондин артмиш’вализ аьхю мяна айи проектар, теклифар гьял гъапIну, Урусатди Азияйинна Тихий океандин региондиъ айи уьлкйирихъди бизнес-проектарин терефнаан кооперацияйин, гьясиллувалин аьлакьйир мюгькам апIувалин месэлйириз дикъатлу фикир тувну.
ВЭФ-дин хяларин арайиъ саки 70 уьлкейиан 5 агъзуриина иштиракчйир – машгьур бизнесменар, политикар, жюрбежюр цирклариан экспертар, гьюкмин органарин вакилар ва гь.ж. айи.
Дагъустандин Глава Сергей Меликовра Владивостокдиъ гъубшу Восточный экономический форумдиъ иштирак гъахьну. Думу, форум гъябгъюрайи вахтна, уьлкейин туризмдин циркил артмиш апIуз кюмек тувру жюрбежюр жягьтлувалар хьади удучIвну.
6-пи сентябриъ Сергей Меликов Урусатдин Президент Владимир Путиндин регьберваликкди кIули гъубшу Госсоветдин президиумдин туризмдин месэлйириз бахш дапIнайи заседаниейиъ иштирак гъахьну.
Гьацира къайд апIуз ккундучуз, сентябрин 7-пи йигъан Владивостокдиъ кIули гъябгъюрайи Восточный экономический форумдиъ Дагъустан Республикайи ва «Корпорация туризм.РФ» АО-йи туризмдин цирклиъ сатIиди лихбан гьякьнаан йикьрар гъийитIну. Документдиин региондин Глава Сергей Меликовди ва корпорацияйин генеральный директор Сергей Сухановди къулар зигбан серенжемдиъ Урусатдин Правительствойин председателин заместитель Дмитрий Чернышенкора (шиклиъ) иштирак гъахьну. Дидин гьякьнаан РД-йин Главайин мялуматарин гъуллугъну хабар тувра.
Йикьрарин асас метлеб – туризмдин цирклиъ кьюбиб терефари гизаф вахтназ сатIиди ляхин гъабхувал ву.
