Советарин Союз дабгъбан кьяляхъ, 20-пи аьсрин аьхириъ ва 21-пи аьсрин эвелариъ вари уьлкейиъси ихь республикайиъра террориствалин гьяракатари чпин чIуру кьастар кIулиз адагъури, гьюкмин кIулиъ айидар, къанун уьбхру органарин вакилар, жямяаьтлугъ мюгьтал дапIну дерккнийи. Тахсиркрарин кьадар гьисаб апIуз даршлубкьан артухъ гъабхьнийи. Думуган тахсиркрарихъди вуйи женгнаъ гьюкуматди ва жямяаьлугъди вари кьувватар сатIи гъапIнийи. Натижйирра ужудар гъахьнийи.
Гьадму йисари, гизафси Бесландин мектебдиъ гъабхьи пашман дюшюшдин кьяляхъ, мялум дару касари мектебарикк бомба ккивна кIуру жюрейин мялуматар туври, инсанариз гучI туври гъахьнийи.
Рябкъру гьялариан, гьадмугандин дюшюшар гьамусра текрар шула. Урусатдин Федерацияйи Украинайиъ хусуси метлеб айи дявдин операция ккебгъхъан мина, уьлкейин аьхю шагьрариъ айи мектебарикк бомба ккивна кIуру мялуматар артухъ шула.
Улихьна йигъари, Мягьячгъала шагьрин швнуб саб мектебдиъ дарсариъ айи бицIидар хулариз гьаъну. Себеб – полицияйиз, мектебдин – электрондин адресназ, мектебдикк бомба ккивна, кIуру мялуматар гъювал ву. Мектебариъ дарсар ккергъну 15 йигъ дубхьнадар, хъа аькьюлсуз инсанари мектебариъ гьялалди бицIидариз дарсар кивуз мумкинвал туврадар.
13-пи сентбяриъ Мягьячгъалайин полицияйин отделиз чан адашра хъади 15 йисаъ айи бай гъахну. Дугъу мектебарикк минйир ккивнайивалин гьякьнаан электрондин кагъзар хътаури гъахьну.
Дагъустандин МВД-йиан туврайи мялуматариинди, Мягьячгъалайин саб мектебдиъ урхурайи бали 17-пи нумрайин мектебдин электрондин почтайиз кьюб кагъаз хътаъну.
Элгьет йигъан дугъу гъибикIну: «Узу, 3 кило тротил ивну, бомба гьязур дапIну, мектебдин тегьлиздиъ айи столикк дивунза. Гьадму бомба абгай». Кьюбпи мялумат йишвну гъибикIну: «Мектебдиъ бомба а, гьякьлуди кIураза».
Гьадму йишван, гъаравулра мектебдиан адаъну, гьацIйишваринган хуйир хъайи саперари мектебдин аьтрафар ахтармиш гъапIну. Бомба гъибихъундар.
Дагъустандин МВД-йин вакили туву мялуматариинди, думу жюре кучIлан мялуматар тувдари «Терроризмдин актнан гьякьнаан кучIлан мялумат тувувализ» къанундин маддайиинди жавабдарвал гъабхуру: 500-700 агъзур манат журум апIуру, 3-5 йисан азадвалихъ мягьрум дапIну, дустагъдиъ итуз мумкин ву.
Ихь жигьилариз гьаму жюре тахсиркарвалар апIувал зарафатси гьибгъра. Хъа думу зарафат дар. Мектебдикк бомба ккивна кIуру мялумат гъеебхьу бицIидарин, дурарин абйир-бабарин кIвакан фикир апIурадар. Эгер учву дурарикан фикир апIурадарш, ичв абйир-бабарикан фикир апIинай. Тахсир гъапIу кас агувалра читин дар. Магьа, сар кас гъидихъну. Гьич дугъу сарди думу ляхин гъапIну даршул. Дугъахъ хъайи дустарра ашкар хьиди. Набалугъар, ичв гележегдин уьмрик тамгъа хьуз гьапIуз гъитрачва?!
Ав, Украинайиъ дявдин гьяракатар ккергъхъан мина, бомбар ккивна, кIуру мялуматар артухъ духьна. Мялум вуйиси, харижи уьлкейиан гъапIу зенгнан, ясана хътапIу мялуматнан эйси агувал читин ву. Хъа ихь уьлкейиъ тахсиркар агувал читин дар. Гьаддиз, тахсиркарвалин рякъюъди мягъянай. Диди саризра я шадвал, ясана хайир хибдар.
