21-пи сентябриъ Дагъустандин Глава Сергей Меликовди Росреестрин кIулиъ айи Олег Скуфинскийихъди ва Беларусь Республикайин хусусиятнан гьюкуматдин комитетдин председатель Дмитрий Матусевичдихъди жара уьлкйириан масу гъадагъру шей’ар жвуван уьлкейиъ гьясил апIбан (импортозамещение) месэлйириз бахш дапIнайи совещание гъубхнийи.

 

 

Дагъустанди Беларусь Респуб-ликайихъди алверчивалинна экономикайинси, культурайин цирклиъра гизаф йисари аьлакьйир уьрхюра.

«Беларусь Республикайиъ ихь региондиз лазим вуйи вари жюре техника гьясил апIура. Гьаму йисан Дагъустанди Белоруссияйин машинар тикмиш апIру комплексдихъди – Минскдин тракторарин заводдихъди – аьлакьйир уьрхювалин месэла варитIан асасубси адабгънайи. Гьаддихъди сабси, Дагъустандин бизнесдин тешкилатарихъди промышленностдин гьясиллувализ лазим вуйи жара хаммал масу гъадабгъбан месэлйирра тартиб апIурача», – гъапнийи совещаниейиъ Сергей Меликовди.

Дугъу къайд гъапIганси, рякъяр тикмиш апIбаъ, зирзибил тартиб, ликариин алахьрудар гьясил апIбаъ, пучIу промышленностдиъ ва гьацдар жара цирклариъ аьлакьйир яркьу апIура. «Ухьу фукьан гизаф гюрюшмиш гъахьиш, гьадмукьан цIийи теклифар, гележегдиъ уьмриз кечирмиш апIуз шлу месэлйир арайиз гъюру», – къайд гъапIнийи Дагъустандин Главайи.

Чан терефнаан Дмитрий Матусевичди сатIиди апIуз шлу ляхнарин терефар улупну: техника рас ва гьясил апIувал, рякъяр тикмиш апIувал, гъулан мяишатдин сурсат масу тувувалин – гъадабгъувалин рынок яркьу апIувал.

«Ухьу улихьна дупнайи ва къулар дизигнайи йикьрар сатIиди тамам апIбиин умудлу вуза. Думу месэлйир кьюбиб терефаризра маракьлу ву. Хъа республикайиъ инфраструктура артмиш апIбан бадали, учу кюмек тувуз гьязур вуча», – гъапну Беларусь Республикайин вакили.

Дмитрий Матусевичди, Дагъустандиз гъюру туристарин кьадар артухъ хьпан бадали, самолетарин маршрут ачмиш апIбан теклифра дивну.

«Гъи учу Урусатдин Федерацияйин варитIан кьибла субъект, транспортдинна логистикайин «Север-Юг» рякъюн саб пай вуча. Думу терефнаан кьюб аьхю проект айич: лап багахь вахтна Дербент ва Хасавюрт шагьрарин гъирагъдиан гъягъру, хъа гележегдиъ Мягьячгъалайин гъирагъдиан гъябгъру яркьу рякъяр тикмиш апIувал. Учву гьадму ляхниъра ич кюмекчйир хьувалик умуд киврача», – гъапну Сергей Меликовди.

Дагъустандин Главайи, Мягьячгъалайин аэропорт цIийи алапIбакан ва «Минск-Мягьячгъала» рейсар ачмиш апIбакан улхури, къайд гъапIганси, кьюбиб терефарин разивал ади гъабхьихъанмина, цIиб вахтналан думу месэлара гьял апIуз мумкинвал хьибди.
Сергей Меликовди республикайин промышленностдин карханйириъ гьясил апIурайиб Белоруссияйин терефназра кьабул хьуз мумкин вуйиваликанра гъапнийи.