Цци, урхбан йисан эвелилан ккебгъну, мектебарин программайиъ «Разговоры о важном» ччвур тувнайи цIийи дарсар ивна. Эгер му предметдин ччвур таржума апIуруш, «Эгьемиятлубдикан сюгьбатар» вая, асас мяна уьбхюри, гъулай саягъниинди – «Метлеблу сюгьбатар» пуз шулу. Му сюгьбатар гьар итни йигъан сабпи дарс вуди гъахуз теклиф апIура. Дурар, классдин сяътариз ухшар вуди, ватанпервервалин, рюгьлувалин ва эдебнан тербия тувбаз бахш апIбанди ву, ва классарин руководителари киври хьиди.
Дарсариъ ватанпервервалин мяълийир, табиаьтдин шиклар ва сесер ишлетмиш апIувалин, ватандин тарихнакан, гъийин йигъкан ва гележегдикан, кьатI’и гьядисйирикан, нумуналу инсанарикан ва хизандин кьиматлуваликан гаф-чIал апIури хьпан теклифар ерхьура; му дарсар лекция саягънандар ваъ, хъа мялимдинна баяр-шубарин сюгьбат саягънандар хьпан важиблуваликан кIура. Гьадму саб вахтна сюгьбариъ агитация вая пропаганда дубхьну ккундар, дурариан кьиматар дивудар, амма дурар ккадаузра хай шулдар.
Эгер му цIийи предметдиз узу фициб кьимат тувраш, дидкан кIуруш, узуз му жюрейин дарсар гизаф мубарак вуйидарси рякъюразуз. Дурари ихь баяр-шубариз чпин ччивар, ата-бабйир, ватандин тарих ва ватандиз багьа вуйиб фу вуш, аьгъю хьуз гъитди, ихь жигьилар гъирагъдилан вуйибди, микIлу кьабар ккадру укI гъабхруси, гъахури хьидар. Эгер думу дарсар лазим вуйи саягъ киври гъахьиш…
Гьелбетда, мектебарин программайиъ дарсарин кьадар гьацира аьхюб ву, ва суал арайиз гъюра: му цIийи предмет программайиъ аьлава вуди иврайин вая, жара предметдин дарсар адагъну, гьадрарианди? Эгер жара дарсарианди вуш, фуну предметдин дарсарианди? Учву фици фикир апIурачва, гьюрматлу урхурайидар?
КIарзаки, табасаран чIал киврайи мялимарихьан гъалаблу хабрар гъюра: саспи йишвариъ, гьацира улдутIну-кучIвугну, имбу-имдру гьялнаъ гъузнайи бабан чIаларин сяътианди цIийи предмет кивуз къарар адабгъна, кIура. ГьапIуз гьамци шула? Эгер Ватандихъди аьлакьа дюбхну ккундуш, ватанпервервалин тербия тувруш, варитIан аьхю дакьатра, алатра бабан чIал ву. Гюкуматдин Конституцияйиинди, милли чIаларин политикайиинди, ухьуз бабан чIалар уьрхяй кIура. Ихь районариъ ва шагьрариъ, бабан чIал масу тутрувди, цIийи дарсарин месэла гьял апIуз шулдарин? Дарш, бачукI лазим ву гъапиган, жвуванурин кIулра имиди думу хувал гъуллугъ уьбхюрайидариз аьдат дубхьнайин? Узу инанмиш вуза, ихь жигьил наслин, ихь чIалнан кьисмат ихь миллетдин вакиларин хилиъ а.
