Мялум вуйиганси, дюн’яйин ригъ алабхъру терефнан уьлкйири Советарин Союзди нациствалин Германияйин кьушмарин ва дидин терефкрарин зиин гъадабгъу Аьхю Гъалибвалин эгьемият ис апIуз чарйир зигури, гизаф йисар ву. Дурар, Гъалибвал гъадабгъбак чпира пай кивувал кми-кмиди кIваин апIури, думу зади дебккуз чалишмиш шула. Мици давм гъабхьиш, вахтар-деврар гьюдюхюри, чпин жанар фида дапIну, Гъалибвал гъазанмиш гъапIдар фужар вуш, тарихнаан адагъубра мумкин ву.

 

Гьаддиз ДГУ-йиъ, РФ-дин образованиейин ва илимдин министерствойин табшуругъназ асас вуди, ватандин тарихнакан аьгъювалар тувбан дарсар 144 академический сяаьтдиина артухъ гъапIну. Гьаддин гьякьнаан учуз вуздин пресс-гъуллугъну мялумат тувну.

«Му дигиш’валар вуздин бакалаврвалин ва пише гъадабгъбан вари направленйириъ тIаъбанди ву. Дагъгосуниверситетдиъ Урусатдин тарих вари факультетарин студентари аьгъю апIура. ДГУ-йин тарихнан факультетдиъ хьуб кафедра а: Урусатдин тарихнан, уьмуми тарихнан, Дагъустандин тарихнан, ватандин тарихнан ва тарихнан ахтармиш’валарин, тарихнан мяднарин ва ахтармиш’валар гъахбан къайдйирин. Хъа факультет кIуруш, варитIан кюгьне вахтнануб ву», – ктибтнийи сюгьбатчийи.

Мидиз улихьна вуздиъ тарихнан аьгъювалар гъадагъуз заан кIул 108 сяаьттIан жара апIури шулдайи. РФ-дин образованиейин ва илимдин министерствойи гьисаб апIурайиганси, вузариъ тарихнан дарсарин сяътар артухъ апIували Урусатдин тарих фицикIа дигиш апIбаз аьксивал улупуз, студентарин арайиъ ватанпервервалин ва ватандаш’валин рюгь мюгькам, жвуван ирснахьна вуйи гьюрмат артухъ ва багъри ватандин кьисматнахъан жавабдарвал гьисс апIуз мумкинвал тувди.

Гьацира «Наука» кIуру чапханайи, милли тарихнакан электрондин жюрейин библиотека яратмиш дапIну, дидин материалар ачухъди ишлетмиш апIуз мумкинвал тувра.