Октябрин 18-пи йигъан гвачIнин ухди йиз телефондиз ляхнин гъарашугъарихьан, таниш дишагьлийирихьан ва багахьлуйирихьан Вари дюн’яйин дишагьлийирин бахтнан йигъахъди тебрик апIбар ва шиклар гъюз хъюгънийзуз. Дишагьлийирин бахт жара бахтарикан фтиинди тафавутлу шулайкIан кIури, фикрар апIури, йиз юлдшарин арайиъ бахтавар дишагьлийир кIваин апIуз хъюгънийза.
Гъи йиз дуст дишагьлийирин арайиъ бахтаврар гизаф а. Амма гьадрарикан гьарсар дишагьлийиин гьадму саб вахтна аьх апIуз даршлубкьан аьхю дерд вая касибвал, велед адрувалихъди аьлакьалу ва ляхин-кар бихъайиз вуйи гъагъи дюшюшар улуркьну. Хъа дишагьлийин гьякьикьи бахт фициб вуш ахтармиш апIури, узу швнур-сар дишагьлийиз ва жилариз суалар тувнийза. Дурари жавабарикан бикIайиз, сифте му машкврин тарихнакан кьюб гаф пуз ккундузуз.
Вари дюн’яйин дишагьлийирин бахтнан йигъ 2017-пи йисан арайиз гъафиб вуйи. Му машквар къайд апIувалин теклиф Америкайиан вуйи дишагьли Карин Рокиндди дивнийи. Машкврин асас метлеб – хайлин вахтна депрессияйиъ ахънайи дишагьлийириз кюмек тувувал вуйи. Карин Рокинддин теклиф вари дюн’яйиъ кьабул гъапIну, ва му машквар йисандин арайиъ шубуб ражари къайд апIуз (21-пи февралиъ, 11-пи июндиъ ва 18-пи октябриъ) къарар адабгъну.
Дишагьлийин бахт фу ву кIуру суалназ саб вая кьюб гафниинди кьатI’и жаваб тувуз шулдар. ИкибаштIан, гьарсар дишагьлийин, бахт фу вуш аннамиш апIувал жюрбежюр жюрейинуб шулу. Гизафси инсанариз бахт – жвуван хизан ва мюгьюббат ву. Саб пай дишагьлийириз бахт чпин мурад-метлебарихъ хъуркьиган бихъуру. Гьаддиз, бахт бихъбан бадали, жвуваз фу гьубкIрадарш ва фти жвув шад ва рази апIураш, фикир тувну ккунду.
Анзира Мягьямедова, Москва шагьур, 50 йис, духтир:
– Ккуни риш вая дишагьли бахтавар апIбан бадали, сюгьюрчи хьувал лазим дар. Хайлин ккергънайи хизанарин вакилариз, сар-сарихъди гизаф йисари сатIиди яшамиш шулашра, чпин уьмрин юлдшиз фу кьабулди вуш, фу маракьлу вуш бейхабарди шулу. Гьарсар дишагьлийин кIваъ чаз хас вуйи жини гьиссар а. Мисалназ, сар кас чаз аьдати фикир туврайиваликанра разиди шулу, тмунуриз гужли гьиссар улупувал, кIваин алдарди апIру пешкешар ккунду. Амма, пуз ккундузузки, уьмрин юлдшихьна айи ккунивал, кIван гьиссар шлубкьан кми-кмиди ачухъ апIинай, ичв дишагьлийиз фикир тувай. Читин вахтна кюмекнан хил гьачIабккай ва, дугъан хъуркьувалар сатIиди къайд апIури, ичв уьмуми гележегдин планар йитIай.
Эльвира Уьмарова, Дагъ. Огни шагьур, 30 йис, туканчи:
– Садар дишагьлийири, уьмрин бахт жвуван веледар ву, кIури ебхьурзуз. Бахт бабвалиъ рябкъюрайи дишагьлийириз чпин «кюкйир» арайиз адагъувал, дурариъ жвуван рюгь ибтувал ва дурарикан лайикьлу инсанар ктаувал лап кьабулди ву. Магьа йиз сижар, дугъаз чан бахт – жвуван баяр ву. Ва, дугъриданра, ужудар бабарин веледарра вафалудар шулу. Хъа гьадмутIан аьхю бахт айин!?
Минара Сяидялиева, Хючна гъул, 28 йис, кейвани:
– Аьхюнуб пай дишагьлийириз чпин бахт чпин хъуркьувалариъ рябкъюра: бизнесдиъ, заан дережайин гъуллугъназ удучIвувалиъ, уткан машнан кIалбариъ, варидариз кьабул шлу гюрчег буй хъайивалиъ. Вари гьаму ляхнаризра хайлин вахт, кьувват ва пулин дакьатар лазим ву. Хъа яшайишди улупурайиганси, ухди-кьанди думу дишагьлийирира хизанар ккергъру ва дурарин уьмрин метлебра чпин веледар ва хизандин мясляаьт шулу. Йиз фикриан, бахт – албагу хизан ву.
Тамара Шихялиева, Мягьячгъала, 42 йис, мялим:
– Бязи дишагьлийири, ккуни инсандихъди чардгъиккра женнет ву, кIуру. Хъа саспидариз бахт девлетнаъ рябкъюра. Ва мици фикир апIурайи саспи шубари чпиз уьмрин юлдашди юкIв улубкьу бай ваъ, хъа ацIу кисе хьайи кьаби жилар ктагъуру. Хайлин дюшюшари улупурайиганси, дициб бахт, гьяйифки, ярхиб шулдар ва мициб кьисмат бахтлуб гъабхьидарин кьадарра аьхюб дар. Гьаддиз йиз сес мюгьюббатнахъан вуйиз!
Юзбегов Артур, Дербент, 35 йис, алверчи:
– Аьхюну пай жилари, дишагьлийирин бахт албагу хизандиъ, веледар тербияламиш апIбаъ, хураг гьязур ва хулаъ марццишан апIбаъ а кIури, фикир апIуру. Узуз гьамци пуз ккундузуз: дишагьли бахтлу вая бахтсуз апIурайир жилир ву. Жилирин хасиятнакан, дугъан янашмиш’валикан, кIван гьиссарикан вари асиллу шула. Эгер учвуз ичв хизандиъ мясляаьт, веледар шадди ва марцциди, хулаъ мани хураг ади ккундуш, ичв дишагьли бахтлу апIинай. Хъа дишагьлийириз ккуниб анжагъ жилирин ужуб гафна аьлхъру маштIан дар.
