Вахтар, нирин штарси, гьялакди гъягъюра, ва дурари чпихъди инсанарин кьисматар, чиб инсанар, бязи гьядисйир саб шилра гъидрибтди гъахура.
Амма кьягьялвалин акв, инсаният бадали улупу игитвал вахтнахьан инсанарихьди кIваълан гьауз гъитуз шулдар.
Гъи Ватандин Аьхю дявдин иштиракчйирин жергйир лап чIикъри, хъа думу читин ва къурхулу йисар ухьхьан лап ярхла духьнайиган, ухьу, жвуван жигьил жанар, кIваъ айи мурадар, ккуни хизанар, бицIидар – вари гъитну, гъаних душмнихъди женгназ удучIвдар затра гьархну ккундар.
Дявдин учIврушнар бегьемди гьисс ва жигьил чагълариъ айи вахтна диди талаф гъапIдарикан сар ихь дирбаш ватанагьли, Арчугъ гъул’ан вуйи Гьяжи Тагъилаевич Рамазановра ву. Думу 1924-пи йисан Хив райондин Арчугъ гъулаъ бабкан гъахьну.
Гьяжи Рамазанов фронтдиз 1942-пи йисан гъушнийи. Украинайин 1-пи фронтдиъ 218-пи тюфенгчи Ромодано-Киевский дивизияйин 667-пи тюфенгчи полкнаъ минометарин батареяйин лишниин цIа алапIру бицIинур сержант Гьяжи Рамазанов 1944-пи йисан апрелин 29-диъ «Дирбаш’вализ лигну» медалиинди лишалу гъапIнийи. Думуган табасаран эскри Висла нирин тмуну гъирагъдиъ ерлешмиш духьнайи душмнарин пулеметарин кьюб дзот дармадагъин гъапIнийи.
Гьадму йисан Арчугъ гъулан дирбаш агьали командованиейи сабансан ражну лишанлу гъапIнийи – III дережайин Машгьурвалин ордендихъди.
«Рамазанов Гьяжи Тагъилаевич йиз адашдин аьхюну чве ву. Думу хайлин гъати женгариъ иштирак гъахьну. Аьхю Гъалибвал дугъу Берлиндиъ къайд гъапIну. Дявдин кьяляхъ йиз эм эскервалин буржи тамам апIуз Германияйиъ гъитну. 1945-пи йисан фициб-вуш уьзриан кечмиш гъахьну. Аьхиримжи кагъзик дугъу дадайиз учв гъуллугъ апIурайи йишваъ фициб-вуш уьзрин тарабгънайи тIягъюндикан гъибикIнийи. Сарун дугъкан саб жюрейинра мялуматар адарчуз»,
– ктибтнийи Азмудин Тагъилаевди.
Хъа дявдин иштиракчийин бицIину гъардшин бай Тажир Тагъилаевдин гафариинди, эмдикан мялуматар уч апIбан бадали, думу Урусатдин Миноборонайин архивариз илтIикIну, амма дугъаз фукIа гъибихъундар.
«Дугъу гъуллугъ апIури гъахьи Ромодано-Киевский дивизияйин архивар гьамусяаьт Украинайиъ а, ва дурарихъди таниш хьуз гъи бажагьат мумкинвал шул. Жараб дарш, дугъан накьв дабгну, саб дюаькьан урхуз аьхю ният ади гъабхьнийиз», – гъапнийи ич сюгьбатнаъ Тажир Тагъилаевди.
Гъит, Гьяжи Рамазановдин ва ватандин азадвал бадали чпин жанар диву дявдин имбу иштиракчйирин рюгьяр Аллагьу Тяаьлайи рази апIири.
