Ватандин Аьхю дявдиъ гъалиб хьпан машкврин улихьна йигъари Табасаран райондин администрацияйин вакилар му пис дявдиъ иштирак’вал гъапIу, гьамусяаьт райондиъ яшамиш шулайи ветеранариин улуркьну.

Дицдар касарикан сар Халагъ гъулаъ яшамиш шулайи Гьясан Ражабов ву. Майдин 6-пи йигъан дугъахьна райондин глава Мягьямед Къурбанов, Дагъустандин сагъламвал уьбхбан министр Жамалудин Гьяжиибрагьимов, Табасаран райондин больницайин кIулиъ айи духтир Абсеретдин Мирзабегов, РД-йин Халкь-дин Собраниейин депутат Алавудин Мирзабалаев ва жарадар гъафну.

Гьясан халуйи чаин улуркьуз дуфнайи хяларихъди аьхю иштагьниинди сюгьбат гъубхну. Дугъу хялариз учв иштирак гъахьи Ватандин Аьхю дявдин вахтнан гьядисйирикан ктибтну.

Гьясан Ражабовди, дяви гъябгъюрайи вахтна чав гъагъи зийнар духьнайи эскер чан кьял’ин илитну, санбатдиз гъурхувалин дюшюшдиканра ктибтну. Гьаци дугъу чан ватанагьли, Гурихъ гъул’ан вуйи Гьямид Сеферов пис аьжалихьан гъюрхну. Дурари дявдин кьяляхъ йисарира сар-сарихъди юлдаш’вал уьбхюри гъахьну.

Гюрюш давам апIури, ветерандихьна гъафи гьюрматлу хялари Гьясан халуйиз кьиматлу пешкешар багъиш гъапIну.

Му гьядисйирикан узуз Гьясан абайин бали Рама-зан Ражабовди ктибтну. Мидланра савайи, дугъу улхьан йигъари чпихьна Дагъ. Огнийин ФОМС-дин вакил Мустафа Акимов гъафиваликанра мялум гъапIну. М.Акимовди дявдин иштиракчийихьан, дугъан фицдаркIа тIалабар ясана аьрзйир аш, гьерхну. Суалназ жаваб вуди, Гьясан халуйин хизанари дармнарин кьитвал айиваликан мялум гъапIну. Му тIалаб тамам апIури, майдин 5-пи йигъан Гьясан Ражабовдихьна вари лазим вуйи дармнарра хьади райондин больнцайиан вакил гъафну.

Хъа гьюрматлу хяларихъди вуйи сюгьбатнан аьхириъ Рамазан Ражабовди, чан абайиз фикир туврайивализ лигну, Гьясан абайиин улуркьуз гъафи касариз чан, вари чпин хизандин терефнаан аьхю чухсагъул мялум гъапIну.