Магьа сабпну гьавйир мичIал гъахьну. Ноябрин эвелиъ сасдар гъуларизди сабпи йифра ктубгъну. Мидихъди сабси, Хив райондин агьал-йир, чарвйирин сюрйир ва маларин лижар дапIну, дурар кьюрд адапIуз галариз хъаъри, гьяракатнаъ а.
Гализ чарвйир хъаъну гъягъюрайи Асккан Яракк гъулан агьали Исламудин Зугьрабовдихъди гаф-чIал гъапIнийза.
«Чарвйирик, маларик лишнар каънача. Мисалназ, сасдар касари чпин гьарсаб чарвайин иб кадабтIна, гьацIари иб’ан урхъ идипна, тмундари шир кадатна, маларинра гьаци ву. Му фтиз лазим ву гъапиш, кIарзавуз. Закур марччли ччил, хюнди кIари гъабхиган, гъуни-гъуншдихъди, гъулажвувахъди улхуб-рахуб дархьуз, фицики лижягъ швнур-сар касдин мал-къара гъя. Кьюрдун эвелиан аьхиризкьан сар касдихьан галиъ гъузуз шлуб дар, аьхир, гьаддиз мал-къара кидикьну, гьамци лижар дапIнача. Йизра, жвуван нубат гъабхьиган гализ душну, мясляаьтниинди мал-къарайихъ гъягъюри, баркаллуди жвуван нубат алдапIури, швнуд-сад йис вуйиз. Саб читин йигъ гъабхьиш, фукьан вушра ккюргъювал, сар-сарин гъавриъ ва гъадриъ хьувал айич.
Гьелбетда, малар-марччар гьамци гализ хъаъруган ва, кьюрд адапIну, гъулаз кьяляхъ хъаъну гъюруган, кюмек лазим ву, гьаддиз гъи гизафдар хъача. Лап кьанди ччилар гъахи ва гьаму йигъари ччилар хру чарвйир (хявриинди аннамиш апIури шулча) кьяб хъайи машиндиъди гъахурaча. ИкибаштIан, гьаци маларра гъахурача. Дарш аьхъю хьибди. Гьарай апIудар гъапну кIури, гьадрарра жан алидар ву. КIари гъабхи хюндиз, ччил гъабхи чарвайиз, хъайигъан чIатна ададапIуз кIури, ярма, кIару хюйин умаж ва кIанккан ккадагъуз тахилин шиларра ишлетмиш апIури шулча. Малар-марччар масу гъадагъуб, дурар лижягъ гъяуб ва фици ккундуш уьрхюб гьунар дар гьа, гьунар дурарин магьа гьамци гъайгъушнаъ хьуб ву», – гъапнийи йиз сюгьбатчийи.
