Ноябрин 18-пи йигъан Хасавюрт шагьриъ яшар 45-йисаъ айи сар касдин машиндиъ ихтиярар уьрхру органарин вакилариз аьхю кьадар наркотикдин сурсат кайи дармнар гъидихъну. Думу касди гьадму дармнар наркотикар ишлетмиш апIурайидариз масу тувуб метлеб ади гъахурайидар вуйиваликан гъапну.
Гьаму жюрейин дюшюшар хьадхъанмина Дербент, Мягьячгъала, Каспийск ва Къизляр шагьрариъра ашкар духьна. Ихь арайиъ наркотикар масу туврайидар амиди, му зегьернан асиллувалиъ ахърайидарин кьадар цIиб хьибдар. Гьаци, ихь ватандаш Сефиятдин бализра наркотик кючейин «дустари» сифте пулсузди, гьевес за апIуз иштетмиш апIуб теклиф дивнийи.
«Учу Табасаран райондиан Мягьячгъала шагьриз 15 йис мидиз улихьна кюч гъахьунча. Жилир 8 йис улихьна кечмиш гъахьнийиз, ва шубур бицIир уьрхюб ва тербияламиш апIуб сар йиз гъюнариин алабхъну. БицIидар хулаз пул гъюрадарш, уьрхюз шулдар. Дурариз алабхьрубра ккунду, ипIрубра. Узу столоваяйиъ поварди ляхниъ дийигъунза. БицIидар ялгъузди хулаъ гъитну гвачIниан хябяхъдиз лихуйза. Гьаддиз узуз аьхюрнур бай Мурадлин дустарра фужар вуш аьгъдайзуз. Хъа вуйиштIан, дугъан дустар наркотикар масу гъадагъру муштарйир агру тIафлар гъахьну. Дурари йиз байра наркотикар масу тувбак каъну», – ктибтура ич сюгьбатнаъ Сефиятди.
Сад йишван Мурад хулаз гъафундар. Думу ва кьюрсана бай, масу тувуз наркотикар жин дапIну дивнайи йишв’ан дурар адагъурайи вахтна, гъидиснийи. Дугъан яш 17 йискьан бегьем дубхьнадайи. Хъа йигъан дурарин хулаз полицияйин гъуллугъчйир гъюру. Бай дахърайи хулаъ дурариз, жин дапIну жвулли гъярябгъю укI абхьнайи бицIи гъибиржнайи багъламйир гъидихънийи.
«Варидарихьан начди вуйзуз: гъуншйирихьан, майил-мадатарихьан, ляхнин юлдшарихьан. Узу бализ лайикьлу тербия тувуз, лазим вуйи кьадар вахт бицIидариз жара апIуз гъабхьундар кIури, варидари нянайикк ккаърайиганси гьибгърайзуз. Мурадлин хасият дигиш шулайиб узуз рябкъюрайзуз. Мектебдин дарсарианра думу кьяляхъ гъузрайи. Амма узу дидиз думуган дикъат фикир тувундарза. Гьяйиф, вахт кьяляхъ апIуз шулдар. Кьяляхъна вахтна Мурад саб дупну усалра хьуз хъюгъну. Сад йигъан думу хулаз багьалу цIийи кросовкйир алди гъафнийи. Ва йиз суалназ мектебдин дарсарин кьяляхъ, аттракционарин паркдиъ учв ляхниъ дийигъуваликан ва гьадушваъ гъазанмиш гъапIу, пулихъ масу гъадагъуваликан гъапи.
Суддин силисар хьадхъан мина гъягъюри гъахьну. Узу гьапIну ккундуш, фу чара апIуруш, затра гъавриъ шуладайза. Йиз чуччун ва дуст шубарин кюмек гизаф гъабхьунзуз. Дурари адвокатра гъидиснийи. Мурад шубуд йисан дустагъдиъ итну», – ухьт алдабхъури, ктибтура Сифиятди.
Дустагъдиан гъафи Мурадлиз ляхин абгузра гъагъиди вуйи. Лихру йишвар ашра, ляхин туврудариз дустгъариъ деу наркоманар кьабул апIуз ккундар. Гьаддиз Мурад чаз ккабхъу ляхин апIуз гъягъюри гъахьну. Сад йислан Сефиятди дугъаз швушв хуру, ва жигьил хизан, Каспийск шагьриъ саб хал кирайихъ гъадабгъну, гьадушваъ яшамиш шулу. БицIи вахтналан Мурад хъана чан сифтейин дустарихъ хъахъру, ва дугъу, дурарин гафарихъ хъебехъну, хъана наркотик ишлетмиш апIуз хъюгъру. Хизандиъ бахтлуди аьдати къайдайиинди яшамиш хьуз Мурадлихьан 6 вазлитIан гъабхьундар. Думу наркотик хьади саб ресторандиъ гъидисну, ва силисарин кьяляхъ судьяйи дугъаз 4 йисна 8 ваз дустагъ гьадабтIуру.
«Суддин къарарин кьяляхъ узуз балихъди гафар апIуз вахт тувнийи. Думу рукьан тIуларикан дапIнайи кьутдиъ итнайи, хъа узу дугъан гъаншариъ кусрийиин деунза. Хил бисуз вая хабаъ тIауз ихтияр адар. Мициб вахтна фу пуза веледдиз? Жан йиз бай, узуз уву ккундузузтIан гъайри, жараб фукIара. Узуз Мурадлин лап язухъди вуйзуз, ва дугъахьна вуйи ккунивал улихьнатIан лап кьувватлу гъабхьнийиз. Амма му ккунивал аьхю зиянсиб, иццруб, учIруб ва гъянаъ айи юкIв убкруб ву. Мурадли узуз «Хил алдабгъ, дада» гъапи ва узухьинди тетрадигъян гъячIябгънайи саб кIаж гьачIабкку. Дидик кюкйирин кунцI дизигнайи. Уз’ан аьхю гьарайнан ишуб тадабхънийи. Гьацир ву йиз Мурад, ужуб юкIв айир, зарафатар кайир, варидарихъ хъугърур ва тясир апIрур. Узуз саб дупну веледар хулаъ гъитну, ляхниз гъягъру вахтар кIваин гъахьунзуз. Гьар хябяхъган узу хулаз гъюруган, Мурадли кюкдин кунцIар дизигнайи кагъаз узуз багъиш апIуйи. Узу, думу ухди уларихьан гьадабгъну, хулан ляхнарихъ хъюгъюйза…
Мурад деетайиз шубуд йистIан цIибди ами. Гьарсаб гъудгниъ узу дугъхъан дюъйир урхураза. Амма думу деетиган дугъаз фици кюмек апIидикIан, думу наркотикарихьан ва алчагъ дустарихьан фици ярхла апIидикIан кIуру фикрари сикинвал туврадарзуз», – гъапнийи сюгьбатнан аьхириъ Сефиятди.
Му хизан табасаран вакиларинуб ву. Сефиятди чан дюшюшнакан ктибтуб узкан чав ккун гъапIнийи, фицики наркотикар масу туврайидарин кьадар жигьиларин ва живанарин арайиъ артухъ шула. Му аьгьвалатназ варидари фикир тувну ккунду. Белки, дугъан кIван дерднакан гъеебхьу жара бабари вахтниинди чпин веледар чIуру рякъ’ан адауз, шаклу дустар ашкар апIуз чарйир зигур.
