25-пи ноябриъ Москва шагьриъ гьар йисан кIулиъ гъябгъюрайи «Бабан чIал, гьадму гьисабнаъ урус чIалра киврайи вари Урусатдин мялимарин мастер-класс» ччвур тувнайи серенжемдин натижйир гъивну. Думу конкурс заочно ва очно жюрейиинди гъубхну.
Конкурсдиъ Урусатдин регионариан 39 мялим иштирак гъахьну. Дурарин арайиъ мялимвалин устадвал улупу, Каспийск шагьрин 3-пи ва 15-пи мектебариъ табасаран чIалнан дарсар киврайи ихь ватанагьли Гюльмира Ширинбеговна Мамедовайи (шиклиъ) 1-пи йишв гъибисну.
Къайд дапIну ккундуки, му конкурс 2007-пи йисхъанмина федералин дережайиъди давам шула, ва дидин асас метлеб – Урусатдин халкьарин чIал ва меденият уьбхювал ву.
Конкурсдиъ кьюб жюрейин номинацйир айи – дарсар кивбан методикайиан ва яратмиш’валин ляхнариан. Сабпи жюрейиндар: «Ляхниъ цIийи къайдйир ишлетмиш апIру мялим», «Мялим-устад», «РФ-дин милли халкьарин чIаларин мялим», «Бабан чIалниин аьшкьламиш шлубси ляхин гъабхурайи бицIидарин багъарин тербиячи» ва «Ватандин Аьхю дявдин Гъалибвалин Йигъаз бахш вуйи дарс гьязур апIуб». Яратмиш’валин номинацияйиан «Бабан чIалариинди вуйи, урус чIалнииндира кади, литературайин яратмишар», «А. С. Пушкиндин эсерар Урусатдин халкьарин чIалариинди урхуб» ва «Бабан чIалариинди вуйи, урус чIалнииндира кади, мяълийин яратмишар» кIуру конкурсар улупнайи.
Гьаму мастер-классариъ конкурсдин иштиракчйири, чпи пишекарвалин фициб дережайиъди бабан чIалнан дарсар кивраш, улупну.
Кьюд йигъандин арайиъ кIули гъуху талитарин натижйириинди, Дагъустандиан вуйи мялим Гюльмира Мамедова «Ватандин Аьхю дявдин Гъалибвалин Йигъаз бахш вуйи дарс гьязур апIуб» номинацияйиан гъалиб гъахьну. Дугъу му конкурсдиз 110 фашист тIанкь гъапIу Аьбдуллагь Сефербеговдиз бахш вуди Манаф Шамхаловди гъибикIу «Снайпер Аьбдуллагь» шиир аьгъю апIбан дарснан методика адабгъну.
Конкурсдин гъалибчи Гюльмира Мамедовайи «Табасарандин нурар» газатдиз туву мялуматариинди, заочно жюрейиинди мушваъ иштирак хьуз мумкинвал айиб аьгъю гъабхьиган, думу чан методикайин ляхнар дина хътауз чалишмиш гъахьну. «Очно вуди иштирак хьуз теклиф гъафиган, аьгъидикIан, аьгъидайкIан кIури, гьапIруш аьжуз гъахьунза. Йиз дина душну гьаз ву, кIуру фикрарра гъахьниз. Хъа узухъди дарсар киврайи мялимари гъарах кIури, рази хьуз гъитнийзу, – ктибтура Гюльмира Ширинбеговнайи. – Конкурсдиъ гьарсар иштиракчийиз мартер-класс улупуз 10 дакьикьа жара дапIнайи. Йиз нубатнаъ узу сягьнайилан уч духьнайидариз Ватандин Аьхю дявдиъ иштирак гъахьидарикан, Хив райондин Чювекк гъул’ан вуйи снайпер Аьбдуллагь Сефербеговдикан, шаир Манаф Шамхаловдикан ва гьацира гьаму деврин игитар вуйи Мягьямед Нурбагьандовдикан, Зейнут-дин Батмановдикан ктибтунза. Мидланра гъайри, уч духьнайидар гьамусяаьт Украинайин аьтрафариин гъябгъюрайи хусуси метлеб айи дявдин операцияйиъ иштирак шулайи игитарихъди таниш гъапIунза. Мастер-класс улупбан кьяляхъ, гьаму конкурсдиз гъягъюз кIури гъибирху ихь халкьдин палатра алди, Пирмягьямед Аслановдин гафариз Аьгьмед Уружевдин мукьмихъди вуйи «Бай гъюрадар» мяълира сягьнайилан гъапIнийза».
Гюльмира Ширинбе-говнайи мяъли дапIну ккудубкIган, залиъ сес-дихкьан адарди, вари ккебехъну гъузну. Хъасин жюрийиъ деънайи кьюр кас удучIвну, дугъан хабар адагъну ва мялимдиз чухсагъул гъапну. Мици къаршуламиш апIувал гъалибвалин лишан вуди гъабхьну.
