Ухьук шадвал ва гьевес капIру хабар а. Хив райондин Хирижв гъулаъ гьалвар гьясил апIру «Руно» кIуру ччвур тувнайи фабрика тешкил дапIна.
Узу тазади дивнайи фабрикайин гьякьнаан ликар алдагъурайи ва дидин директорар вуйи Зульфия Дибировайихъди ва Елена Масаевайихъди гаф-чIал гъапIнийза.
«Руно – табасаран чIалниинди хьа ву. Ухьуз мялум вуйиганси, ихь гьалвин асас пай хьайикан ибарат ву. Хив райондиъ бинайианмина кьюб миллет (лезги ва табасаран) мясляаьт ади яшамиш шула. Ухьуз рябкъюрайиганси, йислан-йисаз ихь халкьарин девлет, хазна ва уьмарат вуйи гьалав, халачи, кюмес, дарушка инсанарин арайиан адахьура. Дурар тартиб ва гьясил апIури гъахьи фабрикйирикан улхурира дархьа. Гъи дурар тIубариинди гьисаб апIуз шулу. Гъи гьалав убхуз аьгъюдар анжагъ хьуцIур йистIан артухъ яш айи дишагьлийир ву. Аргъаж шулайи наслариз бегьемди халачийин алатаркьан ктухуз аьгъдар.
Хъа учу умудлу вуча, ухьусдар халкьарин культурайихъан юкIв убгурайи, хилар хъиржвну лихуз аьшкь, гьевес ва иштагь айи, ватанпервервалин хатI кайи инсанар имиди, ихь арайиан фукIа дубгидар ва адабхъидар. Мурар гьацдар къуру гафар дарич. Дугъриданра, гьадму саб вахтна ихь халкьарин ипIру сурсатна алабхьру палат, чпин хилариинди гъубху гьалав-халачи масу тувну, гъадагъу кьюб кепкиинди вуйи. Мидланра савайи, эвленмиш апIру шурахъ хъапIру гъаб-гъажагъра масу туву халачайин кепкерихъ апIуйи. Хъа му ихь халкьарин тарих даринхъа?
Гьам дявйир, гьамсана гаш’валин йисар культурайин эсерарихъди сабси ихь дадйири ва чйири гьалвариъ атIагна. Фици мурар ихь арайиан адаухьа? Хирижв гъул ктабгъбан себеб гьадму вуки, учуз мушваъ ужуб мулк, халкь, ихь халис суфра ккипбаз ва гьалав убхбаз иштагь айи касар гъидихъунчуз. Райондин туристарин маршрутдин пландикра мушв кипдича. Мектебдиъ урхурайи шубариз пулсузди вуйи кружкйирра тIаъдихьа. Гьамусяаьт учуз ккунди айиб анжагъ дюн’яйиъ ислягьвал хьувал ву. Хъа миди вуйи ич вари фикрар Аллагьдин кюмекнииндди уьмриз кечирмиш апIидича», – къайд гъапIнийи Е.Масаевайи.
Саб гафниинди, халачйирин фаб-рикайин ляхникан яркьуди хьадну думу абццган, ляхин худнаъ абхъган бикIидихьа. Думу абццрайидарин кIваъ айи мурад-метлебар бегьем ишри!
