Украинайин улихь-кIулихь хьайидари Минскдин йикьрар тамам апIуз чиб рази даруваликан мялум гъапIган, 2022-пи йисан 21-пи февралиъ РФ-дин Президент Владимир Путинди ДНР ва ЛНР асиллу дару гьюкуматарди кьабул апIбан гьякьнаан указдиин къул гъизигнийи. Гьюкуматдин кIулиъ айириз дициб къарар кьабул апIуз Урусатдин хатIасузвалин советдин вари вакилари теклиф дивнийи.
2022-пи йисан 24-пи февралиъ РФ-дин Президент Владимир Путин Донбассдиъ хусуси метлеб айи дявдин операция ккебгърайиваликан мялумат хьади ватандашарихьна илтIикIнийи.
Хусуси метлеб айи дявдин операцияйин метлеб — миржид йисандин арайиъ зулмикк ккайи ДНР-ин ва ЛНР-ин агьалйир уьрхювал, Украинайиз ядерный яракь адабгъуз, дявдинна политикайин тешкилатариъ иштирак хьуз ихтияр адру паччагьлугъдин ччвур тувувал, душваъ инсан даккни, миллетчивалин идеология терг апIувал, Крым Урусатдин аьтраф вуйивал Украинайи кьабул апIувал, Донецкдин ва Луганскдин административ сяргьятариъди ДНР-ин ва ЛНР-ин суверенитет Украинайи кьабул апIувал вуйи.
Гьелбетда, дявдин операция мялум апIувал уьлкейин ватанагьлийири сабси кьабул гъапIундар. Президентдин къарариз аькси вуйи гизаф агьалйир харижи уьлкйириз удучIвну гъушну. Хъа дявдин гъуллугънаъ айидар, чпин буржи тамам апIури, Ватан уьбхюз гъудужвну. Далу терефнаъ айидарра даахнадар, дурари Ватан уьбхюрайидариз чпихьан шлу кюмек апIура.
СВО ккебгъхъан мина гьар йигъан кьялан телевидениейихъан генерал Игорь Конашенковди душмандин дагъитмиш дапIнайи дявдин техникайикан, терг гъапIу кьушмарикан ва гьацдар жара мялуматар тувра. Хъа 21-пи сентябриъ бегьем дару мобилизация мялум гъапIган, военный комиссариатариъ айи гъуллугъчйири деету бязи гъалатIари инсанарин арайиъ наразивалар арайиз гъахнийи. Казахстандихъди вуйи сяргьятариин дийигънайи жигьиларин шиклар гизафдариз гъяркъну. Гьадму ляхин бегьем дару мобилизацияйикан гьякьлу мялуматар адрувалиан гъабхьнийи. Ватандашариз гьякьлу мялуматар лазим ву. Хъа эгер мялуматар адарди гъахьиш, халкьди дурар агуз хъюгъру. Гьадму аьгьвалатнаъ гьюкумат даккни бязи касар гьякьсуз хабрар тарагъуз чалишмиш шулу.
Къайд апIувал лазим вуки, чпин пишекарвалин буржи лайикь вуйиси тамам апIру дявдин мухбирари дявдин женгар гъягъюрайи йишвариан репортажар гъахуру. Думу репортажариинди айи аьгьвалатназ кьимат тувуз шулдар. Мялуматар фукьан цIибди аш, гьадмукьан артухъ футнйир, лазим дару хаб-рар арайиз гъюру.
Гъи инсанариз бегьем дару мобилизацияйин дахилнаъди армияйиз дих гъапIу ватандашар фици кьабул гъапIнуш, дурариз фициб палат тувнаш, дурар ипIру-убхърубдихъди тямин вуш аьгъю апIуз ккунду. Хъа гьюкуматдин хатIасузвалин советди СВО-йикан вуйи мялуматариъ жинивал уьбхюб чарасуз вуди гьисаб апIура.
Гьаму йисан декабрин 1-пи йигълан башламиш дапIну, Урусатдин Федерацияйи Украинайин аьтрафариин гъабхурарйи хусуси метлеб айи дявдин операцияйикан мялуматар тувбаз къадагъа дивна.
ФСБ-йин къарар 1-пи декабриъ кьувватнаъ убчIвну. Думу йигълан мина Урусатдин кьушмарин аьгьвалатнакан, дурар тямин апIбакан, гъуллугъ гъабхурайи частарикан, дявдинна политикайин гележегдин артмиш’валикан вуйи мялуматар «харижи уьлкйирин дакьатарин хилиъ ахьувал» Урусатдин Федерацияйин хатIасузвализ хатIалударси гьисаб дапIна. Гьацира документдин сиягьнаъ ватандаш ва аьтрафарин оборонайин планарикан, армияйин объектар уь-рхбакан, ишлетмиш апIбакан ва жарабдикан мялуматар тувуз къадагъа дапIнайи 61 пункт а.
Военный заан гъуллугънаъ айидари гъабхурайи дявдин операцияйин гьякьнаан жинивал уьбхюра. Гьаддиз, мялуматарин дакьатариъ хусуси метлеб айи дявдин операцияйикан мялуматар тувруган, лап ихтиятвал дапIну ккунду.
Аьхириъ Украинайиъ хусуси метлеб айи дявдин операция кIули гъабхурайи ихь эскрариз, Урусатдик умуд кади ккилигурайи инсанарин юкIвар шад дапIну, Украинайин миллетчивалиин ва урсар даккнивалиин гъалибвал гъадабгъну, сагъ-саламатди чпин хизанарихьна кьяляхъ гъювал ккун апIурхьа.
