Вахтарик иццру шулу дявдин зийнар,
Вахтну дурар сагъ апIуру явашди.
Амма вахтнахьанра сагъ апIуз шулдар
Дявдин зийнар, эскру гъахи чан кIваъди.
Ав, ихь халкьдин бажаранлу шаир Шамил Къазиевди гъапиганси, вари уьмриъ ихь уьлкейиз, халкьдиз гъяркъю дявйирин агь-суза, алахьу читинвалар, дарвалар ва гаш’валин лишнар гьич аьсрарииндикьан кIваълан гьауз даршул.
Гъира хаин душмнар ихь уьлкейиз цIакуди лигура. Дурарихъди, игитвал улупури, ихь баяри женг гъабхура. Гьелбетда, пис кьаст айи нацистар ккуршврайи ихь баяр чибра му дявдин майдандиъ пуч шула. Гьяйифки…
Гьаму йигъари Хив райондин Фурдагъ гъулазди учIвру сяргьятариин, Украинайиъ гъабхурайи хусуси метлеб айи дявдин операцияйиъ нацистарихьди сабсан гамран улихьна гъюз гъидритди, дурарин гюллдихь мухур гьивну, кьягьялвал улупури уьмриан гъушу Фурдагъ гъулан агьалйир Гьяжимурад Фарзялиевдиз, Шихяли Шихялиевдиз ва гьадму гъулан багахь ерлешмиш дубхьнайи Ургъа гъулан вакил Альберт Сефербеговдиз бахш дапIнайи суратар кайи кьулин тахта дубснийи.
Му ляхин тамам апIбан вари харжар чаина гъадагъну, улихь гьучIвну думу кIулиз адабгъур Ургъа, Фурдагъ, ВертIил, Атрик ва ХурсатIил гъуларин глава Тельман Къурбанович Гьюсеев ву. Кьулин тахта дубсбан асас метлеб фу вуш ахтармиш апIури, узу ду-гъахьна илтIикIнийза. Дугъан кьатI’и жаваб исихъ чап апIурача.
«Зиихъ кудухнайи гъулариан чпин хал-хизан хъади кючмиш духьну, Каспийск ва Мягьячгъала шагьрариъ яшамиш шулайи ихь баярихьна гьамциб ляхин апIуз ният айиз, кепек-шигьира хиларигъ гъяйиз пну, илтIикIнийза. Йиз ниятназ дурари дишла амин дапIну, узуз, игитарин шиклар хъадаъ, заказ апIурхьа, гъапнийи. Кьюд-шубуд йигълан узу чпихьна илтIикIдар вари заказ хьади гъулаз гъафнийи. Дугъриданра, шиклиъ тувнайи шубрид жигьиларра, игитвал улупну, ихь закурин йигъ бадали уьмриан гъушну. Уьмриан гъягъбалан кьяляхъ Кьягьялвалин ордендиинди лишанлу дапIнайи Г. Ф. Фарзялиевди, Ш. Ш. Шихялиевди ва гьаму йигъари А. Гь. Сефербеговдира Думу субут апIура.
Чухсагъул чпиз. Ватандихъан юкIв убгури, дурари чпин жанар ва лазим гъабхьи йишвахь ифдин цIадал гьяйиф гъапIундар. Дурар кивнайи накьвариз, дурарин абйир-бабариз икрам апIурхьа. Гъубху ва давам апIурайи ляхнин асас метлеб гьадму вуйизки, гъит ихь закурин наслариз халис Игитар машнаан аьгъю ишри ва уьмриъ дурар жигьилариз нумунади гъузри. Худайиз ккарагураза, я рабби му сиягь сарун давам дарибшри! Ухьуз шлу игитар гьич саб вахтнара дявдин майднариъ даришри. Украинайиъ айи ихь баярра вари сабхилди, гъалибвал улихь хьади чпин хизан-кюлфетариина кьадар-кьисмат ишри. Амин!» – кIура Ургъа гъулан советдиз регьбервал туврайи Тельман Гьюсеевди.
