6-пи декабриъ Бакуйиъ Дагъустандин кIулиъ айи Сергей Меликов Азербайжандин Президент Ильгьам Аьлиевдихъди, Азербайжандин экономикайин министр Микаил Жаббаровдихъди, Милли Межлисдин председатель Сагьиба Гъафаровайихъди гюрюшмиш гъахьну.
Хялар кьабул апIури, Азербайжандин Президентди къайд гъапIганси, Азербайжандин Урусатдихъди, думу уьлкейин бязи регионарихъди аьлакьйир яркьу апIувал важиблу ву.
«Дюн’я дигиш дубхьна, дугъри гъуншивалин аьлакьйир уьрхювал — улихь дийигънайи асас месэлйирикан саб ву. Дагъустандиан вуйи дустар кьабул апIуз, дурарихъди вуйи аьлакьйир артмиш апIуз гьарган гьязур вуча», – къайд гъапIнийи дугъу.
Гюрюшдин аьхириъ Ильгьам Аьлиевди Дагъустан Республикайин Главайин теклифчи Мягьямед Къурбановдиз, Азербайжандин ва Урусатдин Федерацияйин, гьадму гьисабнаан Азербайжандинна Дагъустандин арайиъра, дуствалин аьлакьйир артмиш апIбак лайикьлу пай кивбаз дилигну, «Шохрат» орден тувну.
Азербайжандин Милли Межлисдин председатель Сагьиба Гъафаровайихъди вуйи гюрюшдиъ Сергей Меликовди чпи гьюрматниинди кьабул апIбаз чухсагъул мялум гъапIнийи: «Ухьу, гъуншйирси, дустарра вухьа. Дагъустандин ва Азербайжандин халкьарин арайиъ айи дуствал аьсрариан мина дуфнайиб ву. Дагъустандин гизаф миллетарин культурайик азербайжан миллетдин вакилари киврайи пай, дурарин аьдатар учу кIвак ужувлан гъалабулугъвал кади кьабул апIурача».
Дагъустандин Глава сабсан важиблу месэлайиин дийигъну: «Ихь республикйирин географияйин аьтрафар, табиаьтдин гьавйир, дагъларин аьтрафар, гьюлин гъирагъар чиб-чпиз ухшарвал айидар ву. Думу ляхни Дагъустандиз Азербайжандиъ айи ужуб тажрубайихъди таниш хьуз ва думу жвуван республикайиъ ишлетмиш апIуз мумкинвал тувра».
Азербайжандин парламентдин председатель Сагьиба Гъафаровайи, гележегдин аьлакьйирин артмиш’валикан улхури, яшайишдин сатIи вуйи проектариъра аьхю мяна айиваликан гъапнийи. «Ухьу, ухьуз айиб артмиш апIури, цIийибдиз шибритI ккиври, сатIиди ляхин дапIну ккунду. Гьелбетда, уву ич уьлкейиз гъювали ихь уьлкйирин арайиъ айи аьлакьйир яркьу апIуз мумкинвал тувди», – гъапIийи дугъу ва багарихьди Дагъустандиз гъювалин тек-лиф разивалиинди кьабул гъапIнийи.
